Тюнегюн, март айны 14-нде, «Дагестан» деген маълумат агентлигинде болгъан прес-конференцияда «Успех» деген жагьил адамланы иш булан таъмин этивге къарайгъан центрыны ёлбашчысы Шамил Магьамматов «Яш касбучулар» (WorldSkills Russia) деген гезикли чемпионатны гьасиллерин мухбирлеге малим этди.
Ону сёзлерине гёре, ДР-ни загьматгъа ва социал оьсювюне къарайгъан министерлигини, олай да ДР-ни Башчысыны ва Гьукуматыны Администрациясыны сиптечилиги булан шо чара 27-синден мартны 1-не ерли Магьачкъала шагьарда дёртюнчюлей оьтгерилген. Эсгерилеген шо чемпионатны барышында алдынгъы йыллардан берли мердешленип гелеген кюйде, яш касбучулагъа гьар тюрлю тармакъларда оьзлени бажарывлугъун гёрсетмеге имканлыкъ берилген.
Ачыкълашдырып айтгъанда, бу йыл чемпионатны барышына 43 тюрлю касбудан ортакъчылыкъ этген 500-ден артыкъ адамны арасында сынавлар оьтгерилген. Шо да чемпионатгъа къуршалагъан яш касбучуланы санаву артып тербейгенин исбат эте. Шондан къайры да, «Сынавлуланы бажарывлугъу» деген чемпионатны тиретинде оьмюр чагъы 50 йылдан оьтген касбучуланы ярышлары да оьтгерилген.
Мухбирлени соравларына жавап бере туруп, ол дагъы да билдиргени йимик, Дагъыстанны Гьукуматыны Председатели Артём Здунов оьзюню тергевюню тюбюнде сакълайгъаны чемпионатны къурумлу оьтгеривге туврадан-тувра болушлукъ этип геле. Шону булан бирге ДР-ни физкультурагъа ва спортгъа къарайгъан, олай да маданият, юрт хозяйство ва сурсат, транспорт министерликлери чемпионатны оьтгеривге аслам къошумун болдура. Гележекде оьзге министерликлени ва ведомстволаны да чемпионатны оьтгеривге къуршамакъ учун чаралар белгилене.
Чемпионатгъа гьазирлик гёрювню тийишли даражада юрютмек учун шону ортакъчыларына къошум шартлар болдурулажакъ. Тек чемпионатны алдында инг тизив касбучулар гьисапда белгиленгенлеге бизин уьлкени лап йыракъ регионларында юрюлеген сынавлардан оьтмеге тюшегенлиги шексиз кюйде бир тюрлю онгайсызлыкълар тувдура. Шогъар да къарамайлы, буссагьатгъы вакътиге бизин республиканы атындан уьлкени оьлчевюндеги чемпионатда ортакъчылыкъ этежек жыйым командасына къуршалгъанлар мекенли этилген. Олар Къазан шагьарда май айны 20-сындан 24-не ерли «Яш касбучулар» (WorldSkills Russia) деген гезикли Россияны чемпионатында ортакъчылыкъ этежек.
