Яшлар яшавну чечеклери, яшёрюмлер буса бизин гележегибиз. Оьрюм чагъына етишгенлер учун яшав янгы абатлар алагъан, жаваплыкъны гьис этдиреген вакътидир. Гьар янгы наслуланы яшавгъа къараву алышына. Шо буса жамият бир кюйде турмайгъанын ва бир ерде токътамайгъанны исбатлай.
Гьалиги заманда яшёрюмлер яшавну къайсы тармагъында да оьзлени къошумун болдурма, къаравларын, ойларын аян этмеге къаст эте. Яшёрюмлер гьар тюрлю чараларда, форумларда, фестивалларда ва ярышларда ортакъчылыкъ эте. Оланы арасында ерли ва федерал оьлчевлерде гёрмекли уьстюнлюклеге етишгенлери де бар.
Байрам чаралар оьтгерилежек
Россияда яшёрюмлер деп 14-35 чагъындагъылар гьисап этиле. Июн айны 27-си адатлангъан кюйде Россия Федерацияда Яшёрюмлени гюню деп белгиленген. Бютюн Россияны бары да шагьарларында шо гюнге багъышланып гьар тюрлю ёлугъувлар, ярышлар, концертлер буса, июн айны 29-нда оьтгерилежек.
Дагъыстан Республикада яшёрюмлени ишлерине къарайгъан министр Камил Сайитов журналистлер булангъы ёлугъувда эсгерген кюйде, бизин республикада Яшёрюмлени гюнюне багъышлангъан байрам чаралар бу айны 29-нда Магьачкъалада Ленинни атындагъы майданда юрюлежек. Байрам чараланы программасында гьар тюрлю мастер-класлар, спорт ярышлар оьтгерилежек, яратывчулукъ коллективлер ортакъчылыкъ этежек. Яшёрюмлер артистлер концертлер бережек.
Яшёрюмлеге буса оьзлени гьар тюрлю тармакъларда пагьмуларын аян этмеге имканлыкъ берилежек. Яшёрюмлени гюнюне багъышлангъан байрам чаралар Дагъыстан Республиканы оьзге районларында ва шагьарларында да оьтгерилежек.
Яшёрюмлени гюнюню айланасында ДР-ни яшавлукъ оьсювюню ва загьматны министерлигини гьаракаты булан иш ерлени ярмакюсю де оьтгерилмеге гёз алгъа тутулгъан. Эсгерилген чараны болушлугъу булан яшёрюмлеге гьар тюрлю къурумлар таклиф этеген иш ерлер булан таныш болмагъа, гьатта ишге тюшмеге имканлыкъ болажакъ. Шолай да, Яшёрюмлени гюнюнде школаны тамамлап охумагъа тюшмеге хыялы бар яшёрюмлер учун гьар тюрлю охув ожакълар программасын малим этежек.
Гьакълыкъ, адиллик ва тюзлюк
Яшёрюмлер кёбюсю гьалда бюдюремей янгылыкъланы арагъа чыгъармагъа, къолламагъа къаст эте. Янгы наслулар оьзлени имканлыкъларын генглешдирмеге, билимлерин артдырмагъа талпына. Бугюнлерде алда бир де болмагъан, гьатта къаравулланмагъан кюйде билимлерин артдырмагъа, бажарывлугъун камиллеш-дирмеге, янгы касбуланы уьйренмеге имканлыкълар бар. Озокъда, хасиятлары башгъа йимик, гьар яшёрюмню де яшавгъа, дюньягъа къаравлары, умутлары ва хыяллары да башгъа.
Бугюнлерде яшёрюмлени де кёбюсю гележекде яхшы шартларда яшав къурмакъ учун кёп алапа береген касбуланы сайламагъа къаст эте. Мен оьзюне сорав берген 19 йыллыкъ яшёрюм Марат Исмайылов касбусун далапчылыкъ тармакъ булан байламагъа хыялы бар экенин ва шо гележекде оьзю, болажакъ агьлюсю тарчыкъсыз, яхшы шартларда яшав сюргенни сюегени булан англатды. Ону пикрусуна гёре, жамиятны яшавунда инг де агьамиятлы–гьакълыкъ, адиллик ва тюзлюк. Гертилей де, яшёрюмлер яшавда булай хасиятланы агьамиятлы гёрегени сююндюре. Озокъда яхшы шартларда, барлыкъда яшамагъа барыбыз да сюебиз. Тек бугюнгю базар аралыкъланы вакътисинде де яратывчулукъ булан машгъул, адабиятны, маданиятны, инчесаниятны ва ич культурасын биринчи ерге салагъан яшёрюмлерибиз де барлыгъы сююндюре.
Дагъыстанда яшайгъан яшёрюмлеге Ватаныны аманлыгъы, гележеги де ят тюгюл. Оланы арасында тарыкъ болгъанда къанын-жанын аямай Ватанын якъламагъа гьазир экенин исбат этген кёп мисаллар бар. Украина бойдагъы хас асгер гьаракатда ортакъчылыкъ этеген минглер булан игит жагьил уланларыбыз Россияны аманлыгъын душмандан къоруй. Алдагъы гюнлерде Дагъыстан Республиканы халкъы башындан гечирген къайгъылы агьавалатларда жанын къурбан этген полиция къуллукъчуланы арасында да кёбюсю гьалда жагьиллер эди. Айтагъаным, гьар къайсы яхшы якъдан да уьлгю алмагъа болардай яшёрюмлерибиз бар экени сююндюре.
Къайсы касбу да агьамиятлы
Яшёрюмлерибизни арасында гьакъ юрекден оьзлер сайлагъан касбуларда оьр билимлер алып, илму ёлда чалышагъанлары да бар. Мисал учун, Арсен Гьажиев Дагъыстан пачалыкъ университетни физика факультетин тамамлагъан.
Ол 2017-нчи йылда къызыл дипломгъа эсгерилген факультетни магистратурасын да битдирген. Оьзю кёп сююп Россияны илмулар академиясыны Дагъыстан илму-ахтарыв математика лабораториясында инженер ахтарывчу болуп чалыша ва бир вакътини ичинде аспирантурада да охуй. Арсенни, гележекде аспирантураны битдирип, кандидатлыкъ илму диссертациясын якълагъан сонг да илму ёлун узатмагъа къасты бар.
Элвира Загьирова дагъыстан агьлюлени ахтарывчу, социология илмуланы кандидаты. Ону кандидатлыкъ диссертациясы адатлы дагъыстан агьлюлени хас аламатларына, агьлю аралыкъларына багъышлангъан. Бугюнлерде ол оьзю танглагъан тармакъда илму ёлда чалыша.
Арслан Татамов Дагъыстан Пачалыкъ медицина университетни лечебный факультетин тамамлагъан. Дагъыстан Республиканы Башчысы Сергей Меликовну атындагъы стипендиягъа лайыкълы болгъан. Ондан къайры да, 2021-нчи йылда Арслан Татамов «Умник» деген конкурсда ортакъчылыкъ этген ва 500 минг манат акъча савгъат къазангъан. Эсгерилген савгъат диоксид титанны къоллап, сувну югъагъан аврувлардан тазалайгъан къайданы гьазирлегенге берилген.
Шолай да, Арслан бизин республиканы оьсюмлюклерин ва жан-жаныварын ахтарывда ортакъчылыкъ эте. Ол гёбелеклени ва къонгузакъланы коллекциясын жыйыв булан машгъул. Булгаковну ва Набоковну яратывчулугъун охуй. Гележекде яхшы хирург болмагъа, медицина илмугъа яшавун багъышламагъа хыялы бар.
Жамиятгъа, халкъгъа, ватаныбызгъа пайда гелтиреген къайсы касбу да агьамиятлы. Дагъыстанны яшёрюмлерине къайсы касбуну танглагъан буса да, оьзени юреги ушатагъан, илгьам береген ишлерде чалышмагъа насип этсин. Миллетни, жамиятны, гьатта пачалыкъны гележеги кёбюсю гьалда яшёрюмлерден, оланы къастындан, гьакъылындан ва къаравларындан гьасил. Яшёрюмлени сыйлы умутлары яшавгъа чыкъмакъны, олагъа парахатлыкъда, аманлыкъда яшамакъны ёрайбыз.
Патимат БЕКЕЕВА.
