25-нчи Халкъара экономика форумдан

Новости Ёлдаш
17 июня 2022 в 21:18 35
Гьар йыл Санкт-Петербургда Халкъара экономика форум (ПМЭФ) оьтгериле. Дюнья оьлчевдеги майданчада кёп тюрлю экономика масъалалар гётериле ва шолар яшавгъа чыгъарылагъан кюйлер арагъа салына.

Бу йылгъы 25-нчи керен оьтгерилеген форумгъа, Россиягъа билдирилген санкциялагъа да къарамай, кёп пачалыкълардан гелгенлер бар. Дагъыстанны делегациясына Сергей Меликов башчылыкъ эте.

Бу гезик оьтгерилеген форумну аслу чакъырыву – «Янгы яшав – янгы имканлыкълар». Гертиден де, савлай дюньядагъы экономика гьаллар гьар кимни де талчыкъдырмай тюгюл, шону учун да арагъа салып ойлашмагъа кёп тюрлю масъалалар бар. Гелген гьар пачалыкъны ва регионну башчысы шонда пайда болур йимик ёлугъувлар оьтгере ва дыгъарлар эте.

Форумда Дагъыстангъа айрыча ер берилгени биринчи гезик. Шонда Дербент къаланы бир гесегин суратлап, республикада аслу деп гьисапланагъан юзюмчюлюкню имканлыкълары гёрсетилген.

Дагъыстанны Башчысы Сергей Меликов билдирген кюйде, шу форумда республика экологияны, илмуну, финанс масъалаланы, телекоммуникацияны, ёллар къурувну, маданиятны ва туризмни гьакъында 15 тюрлю дыгъар этме гёз алгъа тутгъан. Шондан къайры да, Коми ва Къалмыкъ республикалар булан бирлешип ишлевню гьакъындагъы дыгъарлар да этилежек.
* * *
Форумдан имканлыкъ табып, С. Меликов Ленинградда дав йылларда оьлгенлени къабурларында да болгъан. Бу къабурларда 500 минг шагьарлылар гёмюлген, шолардан 1200-ю – шагьарны немислерден азат этегенде гечинген дагъыстанлы асгерчилер. Шолай да, ол Украинада хас асгер операцияда яраланып, Санкт-Петербургда ятагъан дагъыстанлы яшланы гёрме де баргъан.
* * *
Форумну биринчи гюнюнде Дагъыстанны Башчысы Сергей Меликов «Российский экологический оператор» деген компанияны башчысы Денис Буцаев булан ёлугъуп, къатты коммунал чёплени жыйыв, топлав ва ишлетив гьакъда дыгъар этген.

Шолай да, Дагъыстанны Башчысы Россияны илму академиясыны, ВТБ банкны, «Росконгресс» фондну, Росимуществону, «Точинвест» деген ФПК-ны ва Темир ёлланы жамиятыны ёлбашчылары булан ёлугъувлар оьтгерип тура.
* * *
Форумну экинчи гюнюнде Дагъыстанны ва Къалмыкъстанны башчылары Сергей Меликов ва Бату Хасиков сатыв-алыв, экономика, илму-техника, яшавлукъ ва маданият аралыкъланы гьакъындагъы дыгъарлагъа къоллар салгъан.
* * *
Дагъыстанны вакиллери ДНР-ни Башчысы Денис Пушилин ва Сенегал пачалыкъны вакиллери булан да ёлугъувлар оьтгерген.
* * *
16-нчы июнда Санкт-Петербургдагъы форумну барышында Дагъыстанны Башчысы Сергей Меликов «Туризм: янгы имканлыкълар, янгы белгиленген ёллар» деген сессияда ортакъчылыкъ этген.
Сессияда «Ростуризмни» ёлбашчысы Зарина Догузова, Севастополь шагьарны ва Камчатка крайны губернаторлары Михаил Развожаев ва Владимир Солодов, Къалмыкъ республиканы Башчысы Бату Хасиков ва башгъалары ортакъчылыкъ этген.

Сергей Меликов Дагъыстангъа гелеген туристлени санаву гюн сайын артагъанны, къонакълагъа къарама ерлер барны, тек шоланы къуллукъларын кютювде касбучулар етишмейгенни гьакъында да айтгъан.
* * *
17-нчи июнда Санкт-Петербургдагъы Халкъара экономика форумда Россияны Президенти Владимир Путин ортакъчылыкъ этежеги де белгили.