Дагъыстанны алдагъы спорт министри Магьаммат Магьамматовну аманлыкъны къоруйгъан къурумлар гетген йылны октябр айында тутгъанда, ол Къызылюрт шагьарны башчысы эди. Ачылгъан уголовный ишге гёре, М.Магьамматов министерликни 9 йылны узагъында башын тутуп, хыйлы бюджет акъчаланы урлагъан деп айыплана эди.
Ондан къайры, ахтарывчулар 2006-нчы йылда далапчы Мирза Магьамматовну ва ону 13 йыллыкъ уланын оьлтюрювде Магьаммат Магьамматовну тувра ортакъчылыгъы болгъан деп ёрайлар . Туснакъларда тургъанланы арасында ол «Уллу Магьач» ва «Чалма» деген атлар булан танывлу.
Гьали огъар салынагъан айыплавлагъа бирдагъысы къошулгъан. Россияны Ахтарыв комитетини маълумат бёлюгю билдиреген кюйде, М. Магьамматов Гергебил районну башчысы болуп ишлейгенде бандит уьюрлени ортакъчысы Магьамматгьабип Магьамматнабиевге 100 минг доллар берген болгъан. М.Магьамматнабиев 2013-нчю йылда хас асгер чараланы вакътисинде оьлтюрюлген.
Москвадагъы белгили «Матросская тишина» деген изоляторда сакъланагъан алдагъы министр оьзюне Уголовный кодекс булан гьали салынагъан айыплавлагъа гёре суд ону даимликге эркинликден магьрюм этме болагъанын англагъанда, къолундагъы къан тамурларын гесип, оьзюн оьлтюрмеге къарагъан. Ону авур гьалында Склифосовскийни атындагъы медицина институтгъа етишдиргенлер.
Алав АЛИЕВ.
