1-нчи сентябрде Бабаюрт районну Хамаматюртунда 100 яшгъа ери булангъы «Юлдуз» деген яшлар баву ачылды. Шо «Демография» деген милли проектге гёре къурулгъан.
Яшлар бавуну ярыкъ, арив тизилген эки къабатлы бинасында оьз ашханасы, бары да талаплагъа гёре таъмин этилген медицина кабинети, онгайлы юхлайгъан ва ойнайгъан уьйлери, олай да къошум гьисапда музыка кабинети, спортзалы, сурат этеген ва методистлеге ишлемек учун кабинетлери бар.
Кёпден къаравуллангъан байрам агьвалатда Хамаматюрт админист-рациясыны ёлбашчылары, юрт жамият, гиччипавлар ва оланы ата-анасы ортакъчылыкъ этдилер. Гьюрметли къонакълардан Дагъыстан Республиканы спортгъа ва физкультурагъа къарайгъан министрини орунбасары Зайнал Салавутдинов, Бабаюрт район администрациясыны ёлбашчысыны биринчи орунбасары Мурат Бутаев ортакъчылыкъ этдилер.
Мурат Шамилович Бутаев оьзюню сёйлевюнде районну ва республиканы башын тутгъанлар учун яшланы гьайын этив гьар заманда да инг агьамиятлы масъала экенни ва даим де шолай болажакъны билдирди.
Байрамда районну Россияны халкъларыны «Тангчолпан» деген мердешли маданият Центрыны къуллукъчулары ва тарбиялавчулары да ортакъчылыкъ этдилер. Олар яшлар бавуну ачылывуна багъышлангъан концерт программа онгаргъан эдилер.
Къызыл лентни Дагъыстан Республиканы спортгъа ва физкультурагъа къарайгъан министрини орунбасары Зайнал Салавутдинов, район администрациясыны ёлбашчысыны биринчи орунбасары Мурат Бутаев ва янгы ачылгъан «Юлдуз» деген яшлар бавуну ёлбашчысы Наида Девлетмурзаева гесдилер.
Герейхан ГЬАЖИЕВ,
бизин мухбирибиз.
СУРАТДА: Хамаматюртда яшлар бавуну ачылыву
