Бугюнлерде Сочиде Россияны оьлчевюнде оьтгерилеген инвестиция форуму бизин де тергевюбюзню тартмай болмай. Неге десегиз, шогъар байлавлу мердешленген чараларда башында ДР-ни Башчысы Владимир Васильев булан бирче агьамиятлы проектлени якълап, Дагъыстанны делегациясы да ортакъчылыгъын болдура.
Белгили болгъан кюйде, эсгерилген форумда гьар йыл Россияны инвестиция ва экономика имканлыкълары малим этилине ва шону булан янаша РФ-ни Гьукуматыны Председатели Дмитрий Медведевни ортакъчылыгъы булан социал-экономика якъдан оьсювню лап да агьамиятлы масъалалары гёзден гечириле. Шолайлыкъда, форумда ортакъчылыкъ этеген регионланы, компанияланы, далапчылыкъ булан машгъул болагъанланы арасында гьакълашывланы ва разилешивлени натижасында гележек учунгъу асувлу проектлени дыгъарларына къоллар салына. Демек, гьакимиятны ва бизнесни вакиллерини арасындагъы байлавлукълар беклешдириле.
Алдан берли гёз алгъа тутулгъан кююнде, форумда Дагъыстанны Башчысы Владимир Васильев РФ-ни Гьукуматыны Председателини биринчи заместители Антон Силуанов, РФ-ни энергетика министри Александр Новак ва шолай да «Росагролизинг» деген акционер жамиятны генеральный директору Павел Косов булан ёлугъувлар оьтгерегени де тергевню тартмай болмай.
Ёлугъувланы натижасында «РЖД» деген ачыкъ кюйде иш гёреген жамиятны генеральный директору Олег Белозёров Дагъыстандагъы темир ёлланы онгайлыкъларын камиллешдиривге, шолай да Татарстан Республиканы, ДР-ни Гьукуматыны арасында янгы машинлер булан таъмин этивге байлавлу разилешивлеге къоллар салынагъаны гележек учун хайыргъа токътажагъы шеклик тувдурмай.
Артдагъы йылларда туризмни имканлыкъларын пайдаландырывгъа да бизин республикабызда тергев къолайлашагъаны ачыкъ болуп гёрюне. Шону учун форумда гележекни гёз алгъа тутуп, Дагъыстангъа ял алмагъа гелеген туристлени къуллукъларын кютювню яхшылашдырывгъа байлавлу гьазирленген агьамиятлы проекти де ону ортакъчыларыны айрыча тергевюн тартагъаны негьакъ тюгюл.
Алдан берли адатлангъан кююнде, форумну ахырында, оьзге регионланы башчылары йимик, ДР-ни Башчысы Владимир Васильев де РФ-ни Гьукуматыны Председатели Дмитрий Медведев булангъы ёлугъувда ортакъчылыкъ этежек.
