Арбагюн, июн айны 17-синде, Дагъыстанны милли политикагъа ва динлер булан байлавлу ишлеге къарайгъан министерлигинде прес- конференция болду. Эсгерилген министерликни ёлбашчысы Энрик Муслимов ва «Марва-Тур» деген дазулангъан жаваплыгъы булангъы жамиятны генеральный директору Болат Къурбанов республиканы маълумат къураллары булан ёлукъду. Ону барышында бу йыл дагъыстанлыланы гьаж намаз къылывуну къурумчулукъ масъалалары гьакъда айтылды. Шону булан бирге гьаж намаз къылывну оьтгеривню шартлары гьакъда баянлыкъ берилди.
Инг алда, Энрик Муслимов эсгергени йимик, гьаж намаз къылывгъа гьазирлик гёрювге байлавлу бары да масъалаланы чечмек оьзю ёлбашчылыкъ этеген министерликге борч этилип салынгъан. Шондан къайры да, Дагъыстанны милли политикагъа ва динлер булан байлавлу ишлеге къарайгъан министерлиги гьаж намаз къылывну оьтгерив булан машгъул болажакъ бары да къурумлар байлавлукъда, шолар булан гелишип иш гёре.
– Дагъыстанлы бусурманларыны 2019-нчу йылда гьаж намаз къылывуна гьазирлик гёрмек ва шону къурумлу кюйде оьтгермек муратда алданокъ яшавгъа чыгъарылмагъа тюшеген гьаракатны ёругъун ДР-ни Гьукуматыны Председателини заместители Рамазан Жапаров тасдыкъ этген. Дагъыстанны милли политикагъа ва динлер булан байлавлу ишлеге къарайгъан министерлиги бизин республиканы ругьани управлениеси, олай да «Марва-тур» деген компания булан бирликде бугюнлерде гьаж къылмагъа гьазирленеген бусурманланы арасында оьтгерилмеге тюшеген англатыв иш юрюлюп тура. Айрыча алгъанда, олагъа Сауд-Арабыстандагъы ва гьаж намаз къылагъанлар оьтюп гетежек оьзге пачалыкълардагъы жамият-политика гьалны гьакъында айтыла. Шо уьлкелерде югъагъан аврувланы яйылывуна байлавлу гьалгъа айрыча тергев бакъдырыла.
Бизин республиканы бары да дегенлей шагьарларында ва районларында гьаж намаз къылмагъа гьазирленгенлер булан ёлугъувлар оьтгерилген. Гьаж намаз къылывну шартлары гьакъда олагъа англатыв берилген. Сонг да, Сауд Арабыстанны законларын бузмасны гьайын этип, эсгерилген пачалыкъда бусурманлагъа оьзлени нечик тутмагъа тюшегени гьакъда да айтылгъан,– деди Э. Муслимов.
Дагъыстанны милли политикагъа ва динлер булан байлавлу ишлеге къарайгъан министерлигини ёлбашчысы мухбирлени соравларына жаваплар бере туруп билдиргени йимик, бизин республикадан гьаж намаз къылмагъа гетгенлер гёз алгъа тутулмагъан онгайсыз гьаллагъа тюшген гезиклерде оланы масъалаларын чечмек учун айрыча хас телефон байлавлукъ юрюлежек. Эсгерилген министерликни къуллукъчулары гезик булан, гече-гюн иш ерлеринде туражакъ.
Оьз гезигинде «Марфа-тур» деген компанияны ёлбашчысы Болат Къурбанов да гьаж намаз къылмагъа барагъанлагъа салынагъан талапланы, олай да визаланы Интернетден таба гьазирлевню къайдасына гёчюрюлгени гьакъда айтды. Гьаж намаз къылагъанлагъа медицина якъдан некъадар кёмек этилежеги гьакъда да билдирди. Гьаж намаз къылагъанланы Сауд- Арабыстангъа етишдирмек учун «Ютэйр» ва «Флай Дубай» деген авиакомпаниялар булан дыгъар байлангъан. Бу йыл бусурманлар учун сыйлы ерлеге барып, 10 минг дагъыстанлы гьаж намазлар къылажакъ.
