Белгили экени йимик, бугюнлерде бизин республиканы охув ожакъларында ана тилни жумалыкълары ва айлыкълары оьтгериле. Ана тилни халкъара гюнюню алдында шоланы оьлчевюнде юрюлеген гьаракатларда торайып гелеген яш наслуну вакиллерине ана тилни таъсирин артдырывгъа тергев берилегени йимик, анадаш халкъыны адабият варислигине, олай да адат-къылыкъ байлыгъына да агьамият бериле.
Артдагъы гюнлерде Къарабудагъгент районну Дёргели юртундагъы эки номерли орта школада юрюлген гьаракат да шогъар шагьатлыкъ эте. Ачыкълашдырып айтгъанда, эсгерилген охув ожакъны директоруну тарбиялав ишлеге къарайгъан заместители, школада кёпден берли иш гёреген тарихи музейини ёлбашчысы Магьамматбашир Атагишиевни къасты булан къумукъланы авуз яратывчулугъуна багъышланып юрюлген мажлисде халкъ арада, эл арада айтыла гелеген къакъакъ йырлардан башлап, ваягьлагъа етгинчеге тергев берилди. Нечик де, шо школаны 9-нчу класында билим алагъан охувчу яшлар оьзлени бары гьюнерлерин салып, алдынгъы къакъакъ йырланы йырлап, булкъаны, яшны бешикге салагъан кюйню, алдынгъы къумукъ тойну гесегин гёрсетди. Шону булан бирге, асрулар боюнда айтыла гелеген алгъышланы, масхара къаргъышланы, ясларда этилеген тюрлю ваягьланы малим этип, жыйылгъанланы разилигин къазанды.
Инг алда дагъыстан халкъларыны маданияты ва мердешли адатлары деген дарсны юрютеген Магьамматбашир Атагишиев охувчулар булан халкъ авуз яратывчулугъу гьакъда лакъыр юрютгени де оьтгерилген мажлисни маънасына маъна къошду. Шондан къайры да, ол алданокъ онгаргъан милли опуракъланы, хали-халчаланы, олай да китап выставка эсгерилген мажлисни оьтгерив булан алгъа салынгъан борчланы кютмеге болушлукъ этди деп айтмагъа ярай. Шо гьакъда Къарабудагъгент районну билим берив управлениесини касбучулары М. Гьажиев, Б. Абушев, А. Муталимов, О. Ражабов, олай да эсгерилген районну яшавлукъ масъалалагъа къарайгъан управлениесини къуллукъчусу Н. Мурзаева да оьзлени сёйлевлеринде эсгердилер.
Мажлисни ахырын эте туруп, Россияны халкъларыны мердешли маданиятыны Къарабудагъгент юртда иш гёреген район центрны йыравлары А. Найипханов ва А. Исрапилов йырлары булан жыйылгъанланы гёнгюн ачды. Шондан сонг шо гюн школагъа гелгенлеге татывлу милли ашлар берилип, къонакъ этилди. Эсделикге кёп санавда суратлар да чыгъарылды.
Б. АЙБОЛАТОВ.
СУРАТДА: оьтгерилген мажлисни ортакъчылары ва гелген къонакълар.
