Июн айны 18-нде Магьачкъалада, «Россия – мени тарихим» деген идарада «Маълумат аманлыгъы» деген регионара конференция оьтгерилди. Конференция Россияда маълумат-баянлыкъ тармакъда аманлыкъ болдурувну программаларын къурувну ишинде айтылгъан къурумну гьаракатчылыгъы булан юрюлген.
Конференциягъа гьакимлик къурумлардан, пачалыкъ идаралардан, оьзге тюрлю предприятиелерден гелгенлер 100 адамдан да кёп бар эди. Республиканы ёлбашчыларыны атындан оланы къаршылады ва гиришив сёз булан жыйынны ачды Дагъыстан Республиканы Гьукуматыны Председателини заместители Рамазан Жафаров. Ол эсгерген кюйде, бу тармакъда янгы къайдаланы къоллай туруп, маълумат аманлыкъны болдурмакъ учун булай ёлугъувланы пайдасы бар.
– Янгы къайдалар бек чалтлыкъда оьзге тармакъланы ишине де таъсир этмеге башлагъан. Бир янындан – яхшы, бириси янындан, четимликлер гелтиреген ерлери де бар. Пачалыкъ къурумланы ва коммерция идараланы да аманлыгъын сакълама герек. Интернет-аманлыкъгъа бакъгъан гьай этивню гюн сайын артдырмаса бажарылмай. Шо ишни кютмек учун мугькам билимли касбучулар да тарыкъ, – деп билдирди вице-премьер Рамазан Жафаров.
Дагъыстан Республиканы байлавлукъ ва маълумат министри Сергей Cнегирёв да конференциягъа гелгенлени атына Россияны маълумат аманлыгъы учун терен янашыв герекли къуллукъ экенин эсгерди.
– Компьютер якъдан гьужум токътавсуз арта. Гетген йыл пачалыкъ къурумланы маълумат къуралларына шолай гьужумлар булан 15 миллион керен ёлукъма тюшген. Оланы санаву тамашагъа къалдыра, тек шо санав йылдан-йылгъа артажагъы дагъы да бек ойлашдыра. Шону учун да маълумат аманлыкъ биринчи ерде токътай. Форумну аслу мурады – шо ишде янгы ёлланы ахтармакъ, башгъача къайдаланы излемек, – деп англатыв этди Сергей Снегирёв.
Форумну барышында оьзгелер де чыгъып сёйледилер.
Максим Эсенбиев.
