Белгили болгъаны йимик, Россияда Экологну касбу байрам гюню адатлангъан кююнде 2008-нчи йылдан тутуп, июн айны 5-нчи гюнюнде оьтгериле. Шо да экологланы Бютюндюнья байрамы булан тыгъыс кюйде байлавлу.
Халкъ арада экологлагъа сыйлы касбуну есилери гьисапда айрыча гьюрмет этилинегени англашыла. Бизин пачалыгъыбызда уьлкебизни регионларында табии ерли байлыкъланы къоруп сакълав ва асувлу кюйде пайдаландырыв агьамиятлы масъала десек, гьакъыкъатгъа къыйышмай къалмас. Шолайлыкъда, топуракъ, сув ва агъачлыкъ байлыкъларыбызны тас этивлерден къорумагъа гьар йыл дегенлей жаваплы борчлар токъташдырыла.
Озокъда, белгили себеплеге гёре шоланы толу кюйде яшавгъа чыгъармагъа бажарылмайгъаны гьакъ. О саялы да Россияда экологланы йылын оьтгеривге де айрыча тергев бакъдырыла.
Дагъыстанда Каспийни, Таргъу тавну, Акъ кёлню ва шолай да оьзге табии байлыкъларыбызны – эсделиклерибизни заралдан, тас этивлерден къорумакъ учун чакъда-чакъда булкъалар оьтгерилегени гьакъда да айрыча эсгермеге тюше. Шо да ерли гьакимликни, пачалыкъ къурумланы ва шолай да жамият арасында айлана якъны тазалыгъын къорувгъа байлавлу юрюлеген гьаракатны натижаларын аян эте демеге ярай. Шо саялы да бизге айлана якъны тазалыгъын къорувда ва аманлыгъын болдурувда сыйлы касбуну есилери булан янаша гележекге байлавлу болуп барыбызгъа да уьстюнлюклер ёрамакъ къала.
