Россияны МЧС-ини Дагъыстандагъы управлениесинде республиканы башчысы Владимир Васильевни ёлбашчылыгъы булан хатабалагьланы алдын алывгъа, ёрукълашдырывгъа ва от тюшювден сакъланывгъа байлавлу комиссияны генгеши оьтгерилген.
Эсигизде бардыр, бираз алда Гумбет районда телиянгурлар этген заралны белгилемек учун, башында Дагъыстан Республиканы Башчысыны ва Гьукуматыны ёлбашчысы Владимир Иванов да булан оператив комиссия сапар чыкъгъан эди. Комиссияны составында республиканы Халкъ Жыйыныны Председателини биринчи заместители Сайитагьмат Агьматов, Гьукуматыны Председателини заместители Рамазан Жафаров ва оьзге тюрлю министерликлени, ведомстволаны вакиллери де бар эди.
Генгешни ача туруп, Владимир Васильев бары да гьакимлик къурумларда ишлейгенлени бирче оператив къайдадагъы гьаракатгъа чакъыргъан. Муниципал къурулувланы башчыларына гележекде шулай гьаллар тувулунмасын учун сакъ болмагъа ва алданокъ чаралар гёрмеге буварыв этген. Зарал болгъанланы ичеген сув, дарманлар, ашамлыкъ маллар булан таъмин этиливюн болдурма ва яшама ер берме тарыкъны эсгерген.
Гумбет районну башчысы Гьажимурат Магьамматов генгешде билдиргени йимик, ташгъын сувлар 12 автомашинни, 50-ден артыкъ уллу гьайванланы алып гетген. 4 юртда 111 уьйге, 153 гектардагъы чачывлагъа, 144 гектардагъы емиш тереклеге зарал болгъан. 6 гектар гюлайланны, гектар ярым майдандагъы къоз тереклени, 2 гектардагъы юзюмлюклени тюшюмю де толу кюйде дагъытылывгъа тарыгъан.
Генгешни барышында оьзге юртлагъа болгъан заралланы ёрукълашдырмакъ учун да нечик чаралар гёрме тарыкъ экени эсгерилген.
Зарал болгъан районланы арасында Цунта, Цумада ва Бежта участка да бар.
Генгешни тамамлай туруп, Владимир Васильев болма имканлы хатабалагьланы алданокъ эслеп билип, оланы заралы аз болагъан кюйде гележекде иш тутма тарыкъ экенин англатгъан.
Максим Эсенбиев.
