Тёбен Къазанышны гьакъында айтыла буса, Абусупиян Акаевни атын эсгермей къойма къыйышмай. Ол ким болгъанын къумукъ халкъ яхшы биле. Гьасан Оразаев ону гьакъында язып чыгъаргъан китаплагъа гёре Абусупиянны аты дагъы да бек танывлу болду.

Къазанышлы этик устаны уланы Гьасан Оразаев юртда тувуп, юрт школада охуса да, яшаву, иши – Магьачкъалада. Ол илму-ахтарыв ёлда чалышагъанлы 50 йыллар бола. Аслу гьалда юртлусу Абусупиян Акаевни яшавун ва яратывчулугъун ахтара. Бир адам да эсгергендей, Абусупиянгъа юрт­лулары эсделик салма деп урунса, ону къырыйына Гьасан Оразаевге де ер тарыкъ болажагъын ойлашма тюшежек.

Абусупиянны заманында Къа­занышда тюгюл, оьзге юртларда да арап илмуну охугъан адамлар кёп болгъан. Оланы арасында эрпелили Шихаммат-къади де бар. Ону даражасы нечик бийик болгъанын билмек учун, Эрпелиге де Гьасан йимик бир адам тарыкъ болажакъ. О гьакъда язылгъан китаплар болмаса, халкъ ону нечик билсин?

Китаплар девюрлени суратлай, оланы жамият учун да, халкъ учун да бек агьамиятлы таъсири бола. Дин яшавунда да китап чыгъаргъан адамгъа биринчи даражалы абур, сый тийишли.

Гьасан Оразаев хасият къы­лыкъларына гёре де бек илиякълы адам. Язагъанын чы нечик де, сёйлейген сёзюн де авзундан ойлашып чыгъара. Ол аслу ахтарыв ишлерин Абусупиянны яратывчулугъуна багъышласа да, оьзге юртланы белгили адамларын да излей, таба. Ону яшаву, илму-ахтарыв гьаракаты, гертиден де, халкъны тарихи учун пайдалы болажагъына бирев де шеклик этмей.