Далапчылыкъ имканлыкъ берер

30 сентября 2013 в 14:57 1137
Прочту позже
Далапчылыкъ имканлыкъ берер
«Къызылюрт шагьар» деген муниципал къурулувну башчысы Магьаммат Уцумиев оьтген жумада увакъ далапчылыкъны масъалаларына гёре ишчи ёлугъув оьтгерди ва «Солакъ» деген бизнес-инкубатор ачылгъанны йылгъа ювукъ болагъанны айтып, не ишлер кютюлгенни эсгерди.
Жыйынны ишинде Дагъыстанны орта ва увакъ далапчылыкъгъа къарай­гъан комитетни председатели Арсен Магьмутов, орунбасары Ризван Къурбаналиев ва Къызылюрт районну администрациясыны башчысы Магьаммат Шабанов ортакъчылыкъ этдилер.
– Биз аслу гьалда оьтген йылны ичинде янгы башлайгъанлагъа яда башгъа тармакъгъа чыгъагъанлагъа кёмек болдурдукъ, – дей М.Уцумиев. – Эсгерилген центрда гьавайын консультациялар этиле, бухгалтерия гьисапланы этеген кюй, кредитлер алагъан ва бизнес-планлар къурулагъан кюйлер уьйретиле. Эгер де, далапчылыкъ юрютеген адам уьч йылны ичинде конкурсдан оьтсе, ону ижара гьагъына енгиллик, болдурулгъан малын сатывгъа ва билим алывгъа кёмеклер этиле.
– Бизнес-инкубаторланы харж булан таъмин этивге къаршылыкъ ёкъ, – дей Арсен Магьмутов. – Гелеген эки йылгъа да федерал бюджетден увакъ ва орта далапчылагъа кёп акъча гёрсетилген. Эсибизге гелеген кюйде, шолай чаралар ишни бир ёрукъгъа салма ва инг де кёп адам машгъул болагъан тармакъны дагъы да артдырма имканлыкъ берер.
Шолай да, жыйында бизнес-инкубатор центрланы мекенли ва пайдалы проектлер булан таъмин этивге тергев болдурма гереклиги ачыкъ болду.

Гебек КЪОНАКЪБИЕВ,
оьз мухбирибиз.
Суратда: «Къызылюрт шагьар» деген муниципал къурулувну башчысы Магьаммат Уцумиев оьтгерген жыйындан гёрюнюш.