Зор агьамиятлы масъалалар

Зор агьамиятлы масъалалар

          


                  Россияны Президенти Владимир Путинни Федерал Жыйынгъа Чакъырывунда яшавгъа чыгъарылма герек деп гёз алгъа тутулгъан гьар тюрлю масъалалар гётерилди. Пачалыкъда гьар йылгъа белгиленип юрюлме герекли ишлени бизин Россияны ёлбашчысы йимик мукъаятлы къуршап ёл гёрсетивчю гьалда гьаракат болдуруп билеген мен оьзге бир уьлкени де ёлбашчысын билмегенмен. Терен маъналы Чакъырыв эди.


Мен оьзюмню загьмат ёл булан юрюген оьмюрюмню билим берив тармакъгъа багъышлагъан адамман. Шону учун да бу тема магъа ювукъ. Президент Гьукуматдан «Образование» деген милли проектге къошумлар болдурмакъны таклиф этди. Ол эсгерген кюйде, орта билим береген охув ожакълар къуруп къойгъан булан битип къалмай, билим берив тармакъны имканлыкъларын мекенли къайдада къоллама тарыкъ.


Школаларда ишлейген клас ёлбашчыланы алапаларына къошум гьисапда 5 минг манатдан аз болмайгъан кюйде акъча гёрсетме тарыкъ деген ери де пачалыкъда школа чагъындагъы яшланы тарбиялавгъа нечик тергев берилегенни гёрсете.


Артдагъы 10 йылны ичинде оьр охув ожакъларда бюджет ерлени кемитилегени де чийсынлыкъ гелтире эди. Юрт ерлерде муаллимлени етишмейгени де шогъар байлавлу болма ярай. Чакъырывунда Президент оьр охув ожакъларда бюджет ерлени кемитме тарыкъ тюгюл, оланы кёп этме тарыкъ деп билдирди. Регион вузларда, Дагъыстанда, 70 процентге ювукъ муаллимлени ва докторланы шолай къайдада гьазирлеме герек деген пикру гётериле. ЕГЭ-лени юрютеген кюйлер де мекенлешер ва кемиллешер деп эсиме геле.


 

Мустапа Билалов,

философия илмуланы доктору, профессор.