В. Васильев ватандашланы къабул этген

В. Васильев ватандашланы къабул этген


Декабрни 4-нде «Единая Россия» деген партияны Дагъыстандагъы жамият ожагъында Дагъыстанны Башчысы Владимир Васильев оьзю ватандашланы къабул этген. Владимир Васильев онгача адамлагъа йимик, бир-бир ёлдашлар гётерген жамият маънасы булангъы ортакъ масъалалагъа да тынглагъан.

 


Шолай, алда Украинаны Луганск шагьарында яшагъан Вероника Ковбан деген къатын оьзюню кепсиз уланына медицина якъдан кёмеклер этмекни тилеген. Украинадагъы вакътисинде оьзюню яшы булан гьар айлангъан сайын, медицина ожакълагъа бара болгъанын, гьали Россиягъа гёчгенден берли яшны врачлагъа гёрсетмегенин, дарманлар къолламайгъаны саялы ону гьалы мактапда дарслагъа барып болур йимик тюгюл экенин англатгъан.


Дагъыстанда турагъанда Россияны ватандашыны ихтиярларын алгъан сонг, 2018-нчи октябрде Дагъыстанны диагностика центрында Викторну аврувун бакъгъанлар. Бу лакъырдан сонг, Владимир Васильев бу яшгъа бары да якълардан тергевлер этип, гьажатлы чакъы чаралар гёрмекни, тарыкъ буса, ону квота булан даражасы къолай оьзге хас медицина ожакълагъа йибермекни савлукъ сакълавгъа къарайгъан министерликге тапшургъан.


Ленингентни халкъыны атындан М-Р.Жанбатыров посёлокда янгы поликлиниканы къурмакъны масъаласын гётерген. Ленингентни халкъыны санаву артып турагъанны гьисапгъа алып, В.Васильев Магьачкъаланы гьакимияты да булан бирге савлукъ сакълав министерлигине эсгерилген масъаланы чечмеге имканлыкъ берир йимик ёлланы тапмакъны буваргъан.


Дагъыстанны Башчысыны уьстюне гелгенде Табасаран районну Жули деген йыракъ юртуну вакили Муса Мусаев оьзлени юртунда фельдшер-акушер пунктну къурмаса болмайгъанны англатгъан. Ондан сонг республиканы Башчысы савлукъ сакълав министерлигини башчысыны борчларын заманлыкъгъа кютеген Салман Агьматовгъа тынглагъан. Ол берген баянлыкъгъа гёре, Табасаран ра­йонну бир нече юртларында 20 янгы медицина пунктлар къурулагъанны ва шоланы бириси Жули юртдан 3 ча­къырым ариде болажакъны малим этген...


Чиркейли Абдулмажит Дибиров да В.Васильев булан ёлукъгъанда, халкъны сув булан таъмин этивню онгсуз янларын суратлап сёйлеген. Оьзюнде 10 минг адам яшай­гъан Чиркейге сув 70-нчи йылларда къурашдырылгъан ва чириме башлагъан быргъылардан таба гелегенни, насос станция эсгиленгенни ва шону таман чакъы сувну соруп алып чыгъармагъа гючю чатмайгъанны билдирген.


Шогъар байлавлу Да­гъыстанны къурулушлагъа, ЖКХ-гъа къарайгъан минист­ри Малик Багълиев баянлыкъ бере туруп, Буйнакск шагьаргъа, районгъа ва оьзю Чиркейге гелеген сувну къадарын кёп этмек муратда эсги станция янгыртылып турагъанны, шо ишлеге рес­публиканы бюджетинден 25 миллион манат харж гёрсетилегенни, станция бу йыл онгарылып битежекни, сувну сан янын яхшылашдырмагъа хас сюзювюч имараты ишленегенни малим этди. Янгыз шогьар 52 миллион манат харжланажакъ. Бу ва оьзге масъалалар яшавгъа нечик чыгъарылагъанны къатты тергевню тюбюне алмакъны В.Васильев тийишли ёлдашлагъа тапшургъан.