Рашит АКАВОВ: «Маълумат къураллар да асувлу иш юрютмеге борчлу»

Рашит АКАВОВ: «Маълумат къураллар да асувлу иш юрютмеге борчлу»

            Дагъыстан Республиканы Башчысы Владимир Васильев маълумат къуралланы ёлбашчылары булан оьтгерген ёлугъувунда Россияны Президенти   Владимир Путинни Федерал Жыйынына Чакъырывуну аслу ерлерин эсгерген ва гетген 2019-нчу йылны гьасиллерини гьакъында да айтгъан. О гьакъда охувчуланы да таныш этмек муратда «Ёлдаш» газетни баш редакторуну къуллугъун кютеген Рашит АКАВОВ булан газетни политика бёлюгюню редактору Набиюлла МАГЬАММАТОВНУ лакъырлашыву охувчуланы тергевюне де бериле.


– Рашит Забитович, ёлугъувда Президентни Чакъырывуна байлавлу айта туруп, регионну Башчысы нечик масъалалагъа тергев этди?


– Биринчилей, республиканы Башчысы маълумат къуралланы бары да къуллукъчуларын Россияны Печатыны гюню булан къутлады ва журналистлер халкъны арасында тюз пикру топлавну аслу гьаракатчылары экенин айтды. Сонг да, Владимир Абдуалиевич де эсгерген кюйде, Президентни Чакъырывунда гётерилеген масъалалар яшавгъа чыкъсын учун маълумат къураллар да оьзлени къошумун болдура, пайдалы къуллукъ кюте. Шоланы арасында бизин республика газет де бар.


Чакъырывда, гертиден де, агьамиятлы масъалалар гётериле. Олар булан кёбюсю халкъ таныш да болгъан. Такрарлай турмакъны маънасы ёкъ деп эсиме геле. Тек биз олар йылны боюнда нечик яшавгъа чыгъарылагъан­ны гьакъында материаллар бере туражакъбыз.


– Дагъы да не гьакъда сёз юрюлдю?


– Гетген йылны гьасиллерини гьакъында айтылды. Регионну социал-экономика, савлукъ сакълав, билим берив, маданият тармакъларыны оьсювюн болдурмакъны, халкъны яшав шартларын яхшылашдырма деп къабул этилеген аслу проектлени ва программаланы яшавгъа чыгъарылывуну гьакъында айтылды. Владимир Васильев эсгерген кюйде, ёлбашчылар статистика санавлар булан рази болуп къалмагъа тарыкъ тюгюл. Адамланы яшав гьалларыны гьакъыкъатын гёрюп, гьис этип билмеге герек. Гьакимлик къурумлар халкъ учун ишлейгенин, халкъгъа ювукъ экенин, сёзюнде табылагъанын аян этип билмеге тарыкъ.


Экономикада яшыртгъын иш юрютеген предприятиелер, оьзге тюрлю идаралар налоглар тёлемей буса, республиканы бюджет маяларын толумлашдырмагъа къыйын. Шо ёлда гетген йыл этилген ишлени гьасиллери яхшы. Шону учун да йыллар бою яшавгъа чыгъарылмай тургъан хыйлы масъалаланы чечмеге бажарылгъан.


Сонг да, республиканы Башчысы халкъны ичеген таза сув булан таъмин этивге, ёлланы онгарывгъа, шагьарланы, юртланы онгарывгъа, савлукъ сакълавгъа, дарманлар булан таъмин этивге байлавлу масъалаланы оьз заманында тюзевлю чечиливюню айрыча агьамиятлыгъыны гьакъында да айтды.


– О масъалаланы яшавгъа чыгъар­макъ учун маълумат къуралланы ум­пагьатлыгъын нечик англатмагъа бола?


– Васильев эсгерген кюйде, оьр гьакимият къурумланы гёз алгъа тутгъан бары да гьаракаты яшавгъа чыкъсын учун республиканы ватандашларыны янындан да гьайлы кёмек тарыкъ. Маълумат къураллар буса гьакимлени яхшы ишлерин де, критикагъа ла- йыкълы ишлерин де арагъа чыгъара. Жамият пикруну ярата деп айтмагъа болабыз. Болгъан ишни гьакъында халкъ не ойлашагъанын да гьакимлер маълумат къураллардан таба билмеге бола.


Республиканы Башчысы «Мени Дагъыстаным» деген кадрланы проектин ва оьзге тюрлю агьамиятлы проектлени де яшавгъа чыгъарылывунда гёрмекли гьаракат болдургъаны учун маълумат къуралланы къуллукъчуларына оьзюню баракалласын билдирди.