Президентни ЧАКЪЫРЫВУ

Президентни ЧАКЪЫРЫВУ

Россияны Президенти Владимир Путин январны 15-нде Россияны законлар чыгъарывчуларына он алтынчылай чакъырыв сёз багъышлагъан.


Ону сёйлевю бир сагьатдан къолай заман узатылгъан.


Шогъар байлавлу генгешге Федерация Советини членлеринден ва Пачалыкъ Думаны депутатларындан къайры, Конституция ва Оьр судланы ёлбашчылары, регионланы губернаторлары, закон чыгъарыв жыйынларыны, ругьани тарапланы вакиллери, жамият чалышывчулар, барын да къуршап айтгъанда, 1300-ге ювукъ къонакъ ва 895 журналист чакъырылып гелген эди.


В.Путин баянлыкъ сёзюню барышында экономикагъа, агьлюлени якълавгъа, медицинагъа ва билим беривге, табиатны аявгъа ва къорувгъа айрыча кёп агьамият берди.


Агьлюлени гьакъында айтгъанда, Президент 2024-нчю йылгъа тувагъан яшланы коэффициентин гьалиги 1,5 санавдан, 1,7 санавгъа гётермеге тарыкъны билдирди. Яшлагъа етер чакъы яшлар ожакъларын къурувгъа, башлапагъы класларда охуйгъанлагъа гьавайын аш беривге, январны 1-нден тутуп 3 йылдан 7 йылгъа ерли чагъындагъы яшлар саялы гьар айлыкъ акъча кёмекни къадарын артдырывгъа айрыча гюч бакъдырылажакъ. Аналыкъ капиталны да лап азындан 2026-нчы йылны ахырына ерли узатмагъа чара гёрюлгенин де эсгерди. Эки яшы бар агьлюлер саялы шону оьлчевюн 616 минг 617 манатгъа ерли гётермек арив гёрюлген.


Сонг да, 2020-нчы йыл 1-нчи сентябрден башлап клас ёлбашчылагъа лап азындан 5 минг манатны оьлчевюнде хас къошум гьакъ бермеге тарыкъны да англатды.


О кепде башгъа тармакъларда да гьалны яхшылашдырмагъа хыйлы пайдалы таклифлер берген.