Пачалыкъ савгъатлар тапшурулду

Пачалыкъ савгъатлар тапшурулду

Жуманы башында Дагъыстанны Башчысы В. Васильев Янгы йылны алдында билим берив, маданият, экономика, инчесаният, илму, спорт, юрт хозяйство, савлукъ сакълав ва оьзге тармакъларда патриотлукъ тарбиялавда   къошум этген адамлагъа пачалыкъ савгъатлар тапшургъан.


 

Оьзюню ёлугъувдагъы гиришив сёзюнде Дагъыстанны Башчысы булай эсгерген:

– Янгы йылны алдында биз адатлы кюйде гетип барагъан йылны натижаларын чы­гъарабыз. Яхшы янгъа багъып этилген тюрлю алмашынывланы эслейбиз. Биз ишлени яшавгъа чыгъаргъан чакъы, дагъы да хыйлы иш этмеге тюшегени ачыкъ бола. Бугюн мен оьзлени гьаракаты булан рес­публиканы оьсювюне шайлы къошум этгенлеге пачалыкъ савгъатлар тапшурагъаныма бек сююнемен. Шоланы лап да аслу кюрчюсю – бирлик, аманлыкъ, тангалабызгъа инанагъанлыкъ, далапчылыкъ булан машгъул адамлагъа, яшланы тарбияламагъа шартлар яратылгъанлыкъ.


Бугюн бизин кёп миллетли, гьар тюрлю динлеге къуллукъ этилеген республикада дин идараланы агьамияты гьа­къында айрыча эсгермеге сюемен. 20 йыл алъякъда дин къурумлар Дагъыстангъа халкъара бандит группалар чапгъын этгенде, чинк де сыйлы къылыкъланы сакълап, шо къыйынлы гьаллардан чыкъма кюй тапмагъа кёмек этдилер.


Бизин Президентибиз Владимир Путин бираз алда Да­гъыстангъа гелип гетгенде, шо гьакъда да айтып, Россияны пачалыкъ савгъаты – Дослукъну ордени булан Дагъыстанны муфтийи Агьмат Абдуллаевни ва иудей жамиятларыны советини председатели Валерий Дебияевни савгъатламакъны гьакъындагъы Указгъа къол салгъан эди,–деди Дагъыстанны Башчысы.


Оьзюню сёйлевюнден сонг ол ругь ва маданият адатланы сакълавда, халкъланы арасындагъы дослукъну болдурувда къошум этгени учун Агьмат Абдуллаевге ва Валерий Дебияевге Дослукъну орденин тапшурду.


Кёп заманлар намуслу кюйде чалышгъан, загьмат ёлунда етишген уьстюнлюклери учун Къыбла-Россияны асгер бёлюгюню къувунлу гьалларда ортакъчылыкъ этеген Дагъыс­тандагъы военный отрядыны командири Мирза Гьасановну «Ватанны алдындагъы къуллукълары учун» деген 2 даражалы орденни медалы булан савгъатлады.


Ондан къайры да, Дагъыс­танны Башчысы Россияны художниклерини союзуну члени Магьаммат-Али Алиевге, ДГПУ-ну профессору Мирза Гьасановгъа да «Дагъыстанны алдындагъы къуллукълары учун» деген орденни тапшурду.


Шо ёлугъувда 12 авлетни арив тарбиялап оьсдюргени учун кёп яшлы ана Аминат Элмирзаеваны Ананы ордени булан савгъатлагъанын да айрыча эсгерме ярай. Олай да, «Дагъыстан Республиканы физкультура ва спорт тармакъларда этген къошуму учун» деген медаллар булан   спортну устасы, Олимпия оюнланы чемпиону Магьаммат-Гьасан Абушевни ва боксдан дюньяны чемпиону Зенфира Магьамматалиеваны да савгъатлады...


 

Бизин мухбирибиз.