Кёп охугъан кёп билер

Кёп охугъан кёп билер



       Магьачкъала шагьарны маданиятгъа къарайгъан управлениеси яшёрюмлени ругь якъдан тарбиялавну ишине даим кёп агьамият ва тергев бере.


Муна къаттыгюн, сентябрни 29-нда, «Ачыкъ кёкню тюбюнде – китапхана» деген проектни оьлчевюнде шону сиптечилиги ва къасты булан «Гюзлюк охувлар» деген программа-мажлис оьтгерилди.


Бу ишни якъламагъа, яшавгъа чыгъарывгъа болушлукъ этмеге тахшагьарны башчысы Салман Дадаев оьзю де гелди.


– Магьачкъаладагъы яшёрюмлер ва айрокъда эсли наслу къачан да китапланы хадирин билген ва сюйген. Гаджетлени (къолтелефонланы) таъсири гючлю экенге де къарамай, биз кёп яшёрюмлени китап охувгъа иштагьын гелтирмеге тарыкъбыз. Китапханалагъа ва охувлагъа адамланы бек таткъандырмакъ муратда гючюбюзню артдырып гьаракат этмеге, тахшагьарыбыздагъы гезев бавланы (паркланы) къалгъанларында да шу тайпа чараланы юрютмеге къаражакъбыз, – деп, С.Дадаев Москваны алда оьзю ишлеген Басманный деген районунда да, Пушкин охувлары оьтгерилеген кюйню эсге алып, сёзюн узатды. Белгили дагъыстанлы шаир Расул Гьамзатовну эсделик таш суратыны алдына жыйылып, шо кепдеги охувланы оьтгермекни маънасы барны англатды. Булай пайдалы чарада ортакъчылыкъ этмеге шагьардан кёп адам жыйылажагъына инанагъанын билдирди.


– Неге тюгюл, – деди ол, – о дюр билимлени ой тувдурув таъсирин генглешдиреген, дюнья къаравну къужурлашдырагъан бир демли булакъ.


Саламлашыв ва гиришив сёзлер тамамлангъан сонг, бир нече адам, ортагъа чыгъып, оьзлер ушатагъан назмуланы, классиклени язгъанларын уста кюйде охудулар. Жыйылгъанлар о сёйлевлени, чыгъышланы разилик булан къаршыладылар. Мунда дагъы да гьар тюрлю маънадагъы китапланы выс­тавкасы кимни де тергевюн тартмай къоймады.


Китап тахчалагъа къарап айлангъан Салман Дадаев оьзю китапланы кёп охугъанны ва яш чагъында охугъан китапларын эсге алып лакъыр этди.


Бу арада язывчу Александр Карапац шагьарны баш гьакимине оьзю язгъан назмуланы китабын савгъат этип берди.


Гьасили, «Гюзгю охувлар» ноябрни ахырына ерли гьар къаттыгюн юрюлежек.


 

Залина Тагьирова,

Магьачкъала шагьарны администрациясыны

прес-къуллугъуну управлениесини СМИ булан иш

тутувгъа къарайгъан бёлюгюню начальниги.