Иш ерлер болдурулмаса…

Иш ерлер болдурулмаса…

       Россияны Президентини бу йылгъы Чакъырыв кагъызында кёп пайдалы, халкъны яшавун мол этмек учунгъу таклифлер бары нечакъы да яхшы. Тек шолар яшавгъа чыгъармы экен деген ойлар рагьатлыкъ бермей. Мен йылдан да кёп заманны ичинде иш излей юрюдюм. Адам къайда буса да бир ерде ишлемесе, айлыкъ алапа алмаса агьлюсюн сакълама нече де къыйын заманлар гелген.


Мен юртда яшайман. Гьалиги бизин къумукъ юртларда алда йимик хозяйстволар къалмагъан. Биревлер топуракъ булан долана, яшавлукъгъа амал эте. Биревлер мени йимик иш излей, тапма болмай. Сен айтагъан маданият тармакъны къуллукъчуларына да юрт ярде яшама, ишлеме тынч тюгюл. Олар алагъан алапа булан юрт ерде яшавлукъ этме къыйын. Маданият тармакъгъа 17 миллиард, дагъы да юрт ерлердеги клублагъа, маданият центрлеге 6 миллиарда берилежек деп эсгерилди. Шо акъчаны бир азы сама Дагъыстанны юртларындагъы клублагъа етишерми экен? Мен чи инанып битмеймен. Етишгенче талана туруп юрт ерлеге гьеч мая къалмай. Юрт ерлерде иш булан хакъ таъмин этилмесе, беректли яшав да болур деп эсиме гелмей. Мен оьзюмню сынавумдан, иш тапмай инжингенимден гьасил чыгъараман. Тек умут булан яшама чы герек. Умут уьзмейик.



Гьайбулла Гьажиев, къурулушда ишчи.