Бираз алда Магьачкъалада Дагъыстан медицина университетни бинасында «Экология эндокринологияны масъалалары» деген темагъа гёре илму-практика конференция оьтгерилди. О профессор Сагьадулла Абусуев тувгъанлы 80 йыл битегенликге багъышлангъан эди.
Жыйын башлангъынча алда эсгерилген университетни бинасыны тамына С.Абусуевни эсделигине салынгъан мемориал эсделикни ачывгъа байлавлу агьвалат да болду. Шонда малим этилгени йимик, университетни ёлбашчыларыны ва алимлени советини къарары булан экология медицинаны институтуна белгили алим, профессор Абусуевни аты къоюлгъан.
Илму ишлеге къарайгъан проректор Найида Моллаева конференцияны ачып, медицина университетни ректору Сулейман Маммаевни атындан жыйылгъанлагъа къутлав сёзлер багъышлады. «Сагьадулла Абдуллатипович Дагъыстанда эндокринология къуллукъну яратгъан адам, оьр даражада пагьмусу бар алим эди. Эндокринологланы ва диабетологланы Россия оьлчевюндеги бирлешивюню вице-президенти де дюр эди. Ол оьзюню илму гьаракатын сав этив, аврув багъыв иши булан барышдырып арив юрютмеге усталыгъы бар педагог ва врач да дюр эди.
Биринчи проректорну къуллугъун узакъ йыллар юрюте туруп, ол университетни охутув-методика ишине аслам къошум этген. Аты айтылгъан алим ва Россияны оьр школасыны отличниги де дюр эди. Этген къыйматлы къуллукълары саялы огъар хыйлы керен лап оьр савгъатлар берилгени де кёп затны англата», – деди Н.Маллаева.
Сонг чыгъып сёйлеген ёлдашлар, экология медицинаны илму-ахтарыв институтутну директору Магьамматрасул Атаев, Дагъыстанда медицина страхованиени фондуну директору Ильяс Мамаев, профессор Агьмат Хасаев Сагьадулла Абдуллатипович таза табиаты, асил битими булангъы гьакъыллы ва инсаплы алим экенин гьакъыкъатлы мисалланы ва далиллени эсгерип суратладылар.
Сонг жыйылгъанлагъа С.Абусуевни яшавун бир ягъадан гёзден гечиреген документли фильм гёрсетилди. Шонда ол оьзю язгъан шиъруларын охуйгъан мюгьлетлер де къаравчуланы оьтесиз кепине гелди.
Сагьадулла Абдуллатиповични жан къурдашы ва касбудашы, 1 номерли госпиталь терапияны профессору Агьмат Хасаев «Къурдашны гьакъында сёз» деген докладны жыйылгъанланы алдына чыгъып охуду. Уллу муаллимни, жигерли къурумчуну, гьалал ёлдашны, оьр даражада усталыгъы булангъы докторну гьакъында хабарлады.
Оьзлени якълысы С.Абусуевни эсделигине багъышлангъан илму мажлисде Къарабудагъгент районну вакиллери де ортакъчылыкъ этдилер. Район администрацияны башчысыны биринчи заместители А.Гьажиев оьзюню сёйлевюнде уллу докторну яш йылларын, ол охуп билимлеге ва абургъа ес болгъан кюйню, гьар не саниятдан да англаву бар итти ва саламат гиши болгъанны суратлап арив маълуматланы ва далиллени эсгерди.
З.Атагишиева да профессорну эсделигине багъышлап оьзю язгъан шиърусун охуду.
Конференция терен докладлар, маъналы сёйлевлер булан арив тамамланды.
ДГМУ-ну маълумат къуллугъу.
СУРАТДА: С. Абусуевге салынгъан эсделик.
