Итнигюн, 9-нчу декабрде, А-П.Салаватовну атындагъы Къумукъ музыкалы-драма театрда «Душа Дагестана» деген фестивальны 2019-нчу йылдагъы лауреатларына ДР-ни Гьукуматыны савгъатларын тапшурувгъа байлавлу жыйын ва гала-концерт болду. Концерт программада Ахты, Бабаюрт, Дербент, Ботлих, Къазбек, Къаягент, Хумторкъали, Хасавюрт районланы ва Магьачкъала, Избербаш шагьарланы яратывчу коллективлери ортакъчылыкъ этди.
Театрны фойесинде агъачны ёнуп суратлар этеген уста Багьавутдин Дадаевни, музыкалы алатлар этеген уста Ибрагьимгьажи Алиевни выставкалары да бар эди. Гала-концертни буса ДР-ни маданият министерлиги ва халкъ яратывчулугъуну республика уью онгаргъан эди.
«Душа Дагестана» деген фестивальны савгъатлары милли халкъ маданиятын оьсдюрювде етишген уллу уьстюнлюклери учун бериле. Шо савгъатлар 2012-нчи йылда токъташдырылгъан ва гьалиге ерли 97 адам шогъар лайыкълы болгъан. Бу савгъатлар халкъ бийивю, халкъ йыры, халкъ макъамы, адатлы халкъ маданияты, халкъ уста, халкъ театр, музыкалы халкъ алат, яш пагьму деген номинацияларда бериле. 2019-нчу йыл бу сыйлы савгъатланы алмакъ учун уьч шагьардан ва 48 райондан 51 заявка берилген болгъан.
Савгъатланы тапшурув гюндюз сагьат экиде башланды ва уьстюн гелгенлер сагьнагъа чакъырылды. ДР-ни маданият министри Зарема Бутаева савгъатланы тапшура туруп, лауреатланы гьакъ юрекден къутлады ва гележекде де яратывчулукъ ишинде уьстюнлюклер ёрады.
СУРАТДА: савгъатлангъанлар.
