Бизин республикабызда артдагъы йылларда «Агропромышленный тармакъны асувлулугъу» учун деген милли агьамиятлы проектни оьлчевюнде белгиленген борчланы яшавгъа чыгъарылагъаны тергевню тартмай болмай. Дагъыстан Республиканы юрт хозяйство ва сурсат министерлигини прес-къуллугъу малим этеген кююнде, бизин республикабызны авлакъларында оьсдюрюлген чалтикден гьазирленген дюгю Россияны ва шолай да тыш пачалыкъланы базарларында сатывгъа чыгъарылма башлагъан. Шону гьисапгъа алып, эсгерилген министерликни башчысы Абдулмуслим Абдулмуслимов да къоллавчуланы оьз пикрулары булан таныш этген.
– 2025-нчи йылгъа чалтик оьсдюрюлеген майданланы 22 минг гектарлагъа етишдирмеге токъташгъанбыз, – деген ол. – Озокъда, шону учун эсгерилген майданларда гьар тюрлю онгайлыкъланы да болдурмасакъ бажарылмай. Шону булан бирче бу йыл алда чалтик оьсдюрюлеген 2 гектаргъа ювукъ ердеги чеклени ярашдырмагъа умут этиле.Гьалиги заманда Дагъыстанда болдурулгъан чалтикден гьазирленген дюгю Хасавюрт, Бабаюрт, Тарумов ва Къызлар районлардан Татарстангъа, Азербайжангъа, Уьзбекистангъа ва шолай да Тюркменистангъа йибериле.
Белгили болгъан кююнде, гьалиги заманда бизин республикабызда 82 минг тон дюгю болдурула. Гележекде шону 150 минг тонгъа етишдирмеге умут этиле.
Буссагьатгъы вакътиде чалтикни тазалайгъан уьч заводда республикабызда оьсдюрюлеген чалтикни 80 проценти тазалана. Гележекде бизин республикабызда оьсдюрюлген бары да чалтикни еринде тазаламакъ учун чаралар гёрмеге тюше. Къызлардагъы чалтикни тазалайгъан предприятиени директору Загьидин Къасумов аян этеген кююнде, гележекде бизин продукцияны тыш базарлагъа чыгъармакъ учун имканлыкълар дагъы да артажакъ. Неге десегиз, республика бюджетден чалтик оьсдюрювню асувлулугъун къолайлашдырмакъ учун 120 миллион манат гёрсетилинген.
Дагъыстанны Башчысы Владимир Васильев гьисап этеген кююнде, бизин республикабызда сугъарыв ишлени къурумлу кюйде оьтгермеге имканлыкълар ёкъ саялы, минг гектардагъы чеклер бузукъ гьалда къалып тура. Муна шо саялы да, эсгерилген майданлардагъы чеклени янгыдан яшавгъа къайтармакъ учун 2019-нчу йылгъа республика бюджетден 500 миллион манат харж айырылгъан.
