Бугюнлерде бизин республикада яшайгъан жагьил чагъындагъы адамланы санаву 1 миллионгъа етише. Олардан да аслам пайы – къызлар, оьрде айтылгъан санавну 55 процентин тута. Юртларда ва шагьарларда яшайгъан яшёрюмлени санаву гьакъында айрыча айтгъанда, оланы санавуна тенг геле. Айтагъаныкъ, буссагьатгъы вакътиде шагьарларда 500 минг жагьил чагъындагъы адамлар яшай. Оланы да къап яртысы – Магьачкъалада.
Торайып гелеген яш наслуну вакиллерин оьзлени гёнгюн ачагъан байрамланы бириси гьисапланагъан Россияны яшёрюмлерини гюню булан жагьил адамланы Дагъыстанны Башчысы В. Васильев де къутлагъан. Ону къутлавунда булай айтыла:
«Жагьил адамлар янгылыкълар яратмагъа талпынагъан, бизин уьлкени гележегин белгилейген гюч гьисаплана, бизин гележегибиз де олардан гьасил бола. Дагъыстанлы жагьил адамлар оьзлер яшайгъан республиканы къысматы гьакъда ойлашмай тюгюл. Олар бизин республикадагъы жамият-политика, экономика ва маданият тармакъларда болагъан агьвалатлагъа, гьаракатлагъа барысына да къуршала. Жагьил адамланы арасында юрюлеген ишге бизин республикада аслу агьамият берилип геле. Биз яшёрюмлени патриот ругьда тарбиялавгъа, жагьил адамланы сиптелерин якълавгъа, оланы арасында далапчылыкъны оьсдюрювге тергев бермей тюгюлбюз. Сиз, жагьиллени кюрлюгю, жагьлыгъы ва гьар тюрлю масъалаланы чечивде оьзтёрече янашыву Дагъыстанны янгыртмакъ, гележекдеги оьсювюн болдурмакъ учун бир де болмагъандай агьамиятлы».
