Гьар не янындан да социал къуллукъланы кютеген къурумланы ишини агьамиятлыгъы ва пайдалыгъы гюн сайын арта деп айтма ярай. Къайсы районда да, шагьарда да, юртларда да кёмек тарыкълыланы къуллукъларын кютме деп хас гьаракат юрютегенлер бар. Оланы алапа гьакълары ишге муштарлы этердей болмаса да, къайсы да ишине мекенли янашагъанына шеклик этме тюшмей. Къарт адамгъа яда сакъатгъа кёмек этмек уллу зувап иш де дюр.
Социал къуллукъчуну кёмеги булан таъмин болма сюеген адамлагъа шолай имканлыкълар бар. Оланы уьюне чакъырып кёмеклер алмагъа да бажарыла.
Эгер де къатынгишиге 55 йылдан, эргишиге 60 йылдан кёп бола буса, сакъатлагъа, гьакъылбалыкъ чагъына етмеген яшлар, кёп яшлары булангъы агьлюлер, къыйын яшайгъан, сакъат яшлары бар агьлюлер, къыйынлы шартлагъа табушгъан ватандашлар да социал къуллукъчуну кёмеги булан таъмин этилмеге бола. Тек шо гьакъда бир башлап ерлердеги социал къуллукъну комплекс центрыны комиссиясына арза бермеге тюше. Социал къуллукъчуну йиберсин учун медицина токъташдырыв да тарыкълы.
Шолай кёмекни биринчилей Уллу Ватан давну сакъатлары, ортакъчылары ва шолайлагъа саналагъан адамлар алмагъа бола. О списокгъа 80 йылдан оьтген янгыз къалгъан ватандашлар, 70 йылдан оьтген сакъатлар, дав агьвалатланы сакъатлары ва оьзлеге къуллукъ этип болмайгъан янгыз турагъанлар да гире.
Озокъда, бизин пачалыкъда юрюлеген социал къуллукъну кёп тюрлю халкъ учун пайдалы ерлери бар. Шолардан пайдаланмакъ учун нечик ёлланы излемеге тарыкъ экенни билмейгенлери де аз ёлукъмай. Оланы тапма тынч. Яшайгъан ердеги социал къуллукъланы комплекс центрларына гирип, баянлыкъ алма бир де къыйын тюгюл. Чарасыз болгъан адам кёмек ахтарып айлана буса, огъар бирев де айып этмежек. Социал къуллукъчулар чы айрокъда.
Максим ЭСЕНБИЕВ.
