Май айны 26-сындан июн айны 1-и болгъанча «Къурчакъ театрланы гьайран дюньясы» деген халкъара фестивалы Магьачкъалада юрюле. Шо гьакъда жуманы башында журналистлер булан болгъан прес-конференцияда къурум комитетни членлери англатыв берди. Бразилиядан, Африкадан, Индиядан, Китайдан ва бизин республиканы, Россияны шагьарларындан (Мытищи, Вологда, Магьачкъала, Волгоград) гелген къурчакъ театрлар оьзлени спектакллерин гёрсетежек.
Дагъыстанны къурчакъ театрыны директору Аминат Ягьияева бизин республиканы къурчакъ театры кёп тюрлю тыш пачалыкъларда болгъанны ва биринчи ерлер, халкъара савгъатлар алып къайтгъанны, бизин къурчакъ театрны дюньяны къайсы еринде де гиччипавлар таныйгъанны айтды. Маданият министерликни бёлюгюню ёлбашчысы Марьям Гьажиева да бу халкъара фестивальгъа мекенли кюйде гьазирлик барны, оьр даражада къонакъланы къаршылап, Дагъыстанны сыйын гётерме болажакъны эсгерди. Дагъыстан илму центрны баш касбучусу Гулизар Солтанова ва Къумукъ театрны чебер ёлбашчысы Айгум Айгумов печат къуралланы янындан театрланы гьаракатына тергев етишмейгенни, бир жуманы узагъында юрюлежек бу халкъара фестивальны гьакъында газетлер ва телевидение генг кюйде маълуматлар берме, къонакъланы оьр даражада къаршылап болагъаныбызны гёрсетме тийишли экенни гьакъында айтдылар.
