Сорав – жавап:

– «Земский доктор» ва «Земский фельдшер» деген программалагъа гёре юртлагъа барып ишлеме рази, оьр яда орта билим алгъан медицина къуллукъчулагъа аслам акъчалар бериле дей. Шо хабар гертими ва оьлчевю нечакъыдыр?

– Шолай программа ишлейгенли бир нече йыллар бола. Эгер де медицина къуллукъчу 5 йыл юртгъа барып ишлесе, врачлагъа – 1 миллион, фельдшерлеге, акушерлеге ва медсестралагъа 500 минг манат бериле.

Эгер де шо къуллукъчу  дыгъарны бузса, гёрсетилген акъчаны къалгъан янын къайтарма герек. Шо янгылыкъланы гьакъында гьар региондагъы савлукъ сакълав министерликлерде билме бола.

* * *

– Яшылчалар ва картоп оьсдюрегенлеге субсидиялар гёрсетиле деп айтыла.  Нечакъы бериле ва нечик алма бола?

– 2023-нчю йылны 1-нчи январындан тутуп, шолай федерал оьлчевдеги проект 76 регионда ишлеме башлагъан. Шогъар асасланып, субсидия гиччи ва орта оьлчевдеги, гьатта абзарягъа  хозяйстволагъа берилме гёз алгъа тутулгъан. Шо ашамлыкъ сурсатны болдурувну даражасындан да гьасил болажакъ. 

Гиччи оьлчевдеги хозяйстволагъа шо субсидияланы топуракъны ишлетивден къайры да, экология сакълыкъгъа, топуракъны дагьнисин артдырывгъа ва сан янлы этмек учун къолламагъа ихтияр бериле. 

Субсидияланы гьакъында юрт хозяйство министерликде ва ерлердеги юрт хозяйство управлениелерде билме боласыз.

* * *

– Хас асгер гьаракатда ортакъчылыкъ этегенлени агьлюлерине не кёмеклер гёрсетиле?

– Шо агьвалатларда ортакъчылыкъ этегенлер парахат болсун. Федерал оьлчевдеги кёмекден къайры да, регионлардан берилме герек харжлар да бар.

Дагъыстанда къурулгъан «Барыбыз да бирче» деген фонддан гьар ортакъчыны агьлюсюне 50 минг манат берилди.

Хас асгер гьаракатда ортакъчылыкъ этегенлени агьлюлерине яшавлукъ ва медицина яда иш булан таъмин этив кёмеклер де болдурула. Шолай да, олагъа республикадан 100-ер минг манатлар гёрсетиле.

Яшлар бавлагъа барагъанлыкъ, кружокларда ва секцияларда ортакъчылыкъ этивю гьакъ беривден азат этиле, охума тюшегенлеге енгилликлер гёрсетиле. Дагъыстан юрт хозяйство университет шолай яшланы экзаменсиз къабул эте.

Эгер де агьлюде уллу чагъындагъылар бар буса, олагъа къарама социальный къуллукъчуну бегетме бола.

* * *

– Пенсиягъа чыгъагъанда сексенинчи йылларда асгерде болгъанлыкъ да къошуламы?

– Совет ва Россия армияда борчун кютгенлени йыллары, эгер де алдында ва асгерден къайтгъанда ишлей болгъан буса, пенсиягъа чыгъагъанда гьисапгъа алына.

Шолай да, пенсиягъа чыгъагъанда яшгъа 1,5 йыл битгенче къарав болдургъаны, сакъат яшны сакълагъаны ва 80 йылдан артыкъ яшагъанлагъа къара­гъанлыкъ да стажгъа гире.

Авторизация
*
*
Регистрация
*
*
*
Согласны с условиями сайта?
Генерация пароля