Магьачкъалада юрюлеген Дагъыстанны шагьмат оюндан 8-нчи чемпионатын токътатма тюшген. Чемпионатны ортакъчысы 30 йыллыкъ Умайгьанат Османованы гьалы бузукълашып, огъар алгъасавлу кюйде скорый помощну къуллукъчуларын чакъыргъанлар.
Сонг белгили болгъан кюйде, турнирни башгъа ортакъчысы Амина Абакарова оюнланы алдында, яшыртгъынлап залда бирев де ёкъ заманда, У.Османованы шагьмат такътасыны тюбюне гюнесувну тёкген. Бир затгъа да шекленмейген къатын гелип еринде олтургъанда узакъ къалмай ону башы айланма, къусугъу гелмеге башлагъан, врачлар ону азарханагъа алып гетген.Турнирни къурувчулары видеокамералардан таба Европаны чемпиону Умагьанат неден агъулангъанын ва шогъар ким айыплы экенни токъташдыргъан.
А. Абакарова шагьмат оюндан Темиркъазыкъ Кавказны чемпиону, Магьачкъаладагъы лицейлени бирисинде дарслар юрюте. Умайгьанатны таныйгъаны хыйлы йыллар бола, кёп турнирлерде бирче ортакъчылыкъ этген, не себепден ёлдашын агъулама сюйгенин бирев де мекенли билмей. Ол тутулгъан ва огъар къаршы уголовный иш ачылажакъ.
— Амина Абакарова этген затны гьали де башыма гийирип болмай тураман. О чу янгыз Умайгьанатгъа тюгюл, оьзгелеге де, оьзюне де зарал гелтирмеге бола эди. Чемпионатда ортакъчылыкъ этген шагьматистлени лап гиччисине 6 йыл битген, лап уллусуну чагъы 90-гъа тармашгъан. Абакарова дагъы бир турнирде де ортакъчылыкъ этмежек, — деп язгъан талеграм каналында Дагъыстанны спорт министри Сажид Сажидов.
Алав Алиев
