Белгили экени йимик, артдагъы бир нече йылланы узагъында бизин республикада «Яшланы школагъа гьазирлейбиз» деген рагьмулукъ гьаракат оьтгериле.
Бизин белгили жамият чалышывчулар, республиканы гьакимлик къурумлары—ны жаваплы къуллукъчулары, олай да далапчылар къуршалагъан шо гьаракат бу йыл да оьзюню чалышывун къурумлу кюйде оьтгережек деп къаравуллана. «Россияны аналары» деген республика бирлешивюню ёлбашчысы Сефижат Магьамматрасулова маълумат къуралларыны мухбирлерине шо гьакъда билдирген.
Ону сёзлерине гёре, етимликде оьсеген, олай да савлугъу осал яшланы яшавлукъ масъалаларына савлай жамиятны тергевюн бакъдырмакъ янгы охув йылны алдында мердешли кюйде оьтгерилеген шо гьаракатны алдына салынагъан аслу борчлардан болуп токътай. Шондан къайры да, четим яшавлукъ гьаллагъа тюшген Украина бойда юрюлеген хас асгер гьаракатгъа къуршалгъанланы авлетлерине гьайлы янашывгъа да оьтгерилеген шо гьаракатны барышында яхшы тергев берилежек. Ачыкълашдырып айтгъанда, школагъа юрюйгенде гьар гюн гийилеген опуракълар, аякъгийимлер, охув китаплар булан бирге языв этегенде къолланагъан, оьзге тарыкъ-герек алатлар олагъа савгъат этилип берилежек.
Н. БАЙБОЛАТОВ.
