Ювукъда ябушувну бокс журасындан Ташгент шагьарда юрюлген чемпионатында бизин къумукъ улан Шарапутдин АТАЕВ 86 кило авурлукъда алтын медальгъа лайыкълы болгъаны гьакъда газетни бетлеринде де язылып чыкъды. Оьтген жумада савлай дюньягъа атын данггъа чыгъармагъа бажаргъан чемпионну Дагъыстанны боксдан жыйым командасыны баш тренери Рашитбек Агьматов ва оьзюн ябушувну сырларына уьйретеген тренери Солтан Мигитдинов булан бирче «Ёлдашны» редакциясында милли газетлени мухбирлери булан ёлугъуву болду.
Инг алда Шарапутдин Атаев юртдагъы спортзалгъа атасы оьзюн лап гиччиде гелтиргенин айта туруп, бир башлап тутушуп ябушув булан машгъул болуп тургъаны гьакъда эсгерди. Оьзюне къардаш тиеген Солтан Мигитдинов шо йылларда боксда етишип гелеген гёрмекли оьрлюклер себеп болуп, сонггъа таба спортну шо журасы булан иштагьлангъан. Ондан уьлгю алып, оьрлюклеге оьзю де ругьлангъан. Неге тюгюл, Солтан Мигитдинов республиканы ва уьлкени оьлчевюнде юрюлгенлеринден къайры да, халкъара ярышларда да алдынлыкъ алып тургъан. 2012-нчи йылда Лондонда оьтгерилген Олимпия оюнларында ортакъчылыкъ этген. Оьрюм чагъында оьзюню тенглилери йимик, Ш. Атаев атын айтса савлай дюньяда таныйгъан белгили спортчулар Мугьаммат Али, Майк Тайсон, Рой Джонс тогъатартывланы вакътисинде гёрсетеген гьюнерлеге сукъланып, олагъа ошамагъа да къаст этген.
Ону сёзлерине гёре, спортда оьзлюгюнден уьстюнлюклеге етишмеге бажарылмай. Гьар къайсы спортчугъа да оьзю танглагъан журасында усталыкъ булан бирге бажарывлукъну артдырмакъ учун, бир де арасы бёлюнмейген кюйде ишлемеге тюше. Айрокъда уллу ярышларда уьст гелмек учун бир де яллыкъ билмей тренировкалар оьтгерип турмагъа тарыкълы бола. Дагъыёгъесе, спортда алгъа салынгъан муратгъа етишмеге къыйын.
Шондан сонг да, ол эсгергени йимик, 2021-нчи йылда Белград шагьарда оьтгерилген дюньяны чемпионатыны финал тиретинде ол оьзю булан тогъатартгъан Азербайжан учун ябушагъан кубалы спортчу Лорен Альфонсо Домингесни утмагъа умутлу болгъан. Шо мурадына етишмеге бажаргъаны да огъар юрек яллыкъ бере.
Оьзюню гезигинде Рашитбек Агьматов мухбирлени соравларына жаваплар къайтарды. Ол билдиргени йимик, Шарапутдин Атаев боксдан юрюлеген дюньяны чемпионатында шулай гёрмекли оьрлюклеге етишген дагъыстанлыланы арасында бешинчи спортчу гьисаплана. Къумукъланы арасында буса гьалиге ерли боксдан алтын медаль алгъан спортчу болмагъан.
Ол гёрмекли уьстюнлюклеге етишмеге болагъан спортчуну гьазир этмек учун тренерге 10-12 йыл ишлеме тюшегени гьакъда да айтды. Спортзалгъа биринчилей гелген яш башлапгъы гёрмекли уьстюнлюгюне янгыз 22-23 йыл чагъында етишмеге бола. Демек, ол торайгъанчагъа оьрюм чагъындан жагьилликге ерли етишдирмеге, гьар тюрлю ярышларда ортакъчылыкъ этивюн болдурмагъа тюше. Шо саялы да лап оьр даражада юрюлген ярышланы алдынлылары да тренерни ишин юрютмеге сюймейлер. Шону учун да бугюнлерде тренерлер болуп янгыз шо ишге къарны-гёнгю булан берилгенлер чалышагъаны гьакъда айтмагъа бажарыла.
Сербиядагъы чемпионатны барышы гьакъда айта туруп, ШараПутдин Атаев: «Финал тиретинде Лорен Альфонсо Домингес булан оьтгерген ябушув лап да къыйынлыларындан бириси болуп токътады», – деди. Тек ол ябушувну ахырынчы мюгьлетине ерли къуватдан тюшмей турмагъа да болду.
Оьтгерилген шо ёлугъувну вакътисинде белгили болгъаны йимик, Шарапутдин Атаев касбучу спортчуланы арасында гезикли ябушувун июн айны 17-синде оьтгермеге гёз алгъа тутгъанын айрыча эсгермеге тюше. Тек алдын къолун авуртдургъан саялы, шо ябушувну оьтгеривню болжаллары артгъа салынып къалмагъа да бола.
Шондан сонг спортда да, яшавда йимик, спортчу ярышларда биринчи ерни алмагъа къаст этсе де, бир тюп бола, бир уьст болагъанын айта туруп, Солтан Мигитдинов гьар къайсы тармакъда йимик, уьстюнлюклеге етишмек учун къаныгъывлу кюйде чалышмагъа тюшегенин ташдырды. Ярышларда алдынлыкъ алгъанда олар булан бирче тренер де сююнегенин, гележекде болажакъ уьстюнлюклеге ругьланагъанын айтды.
– Утдуруп къойгъан гезиклерде буса юрюлеген тогъатартывну барышында йиберилген кемчиликлени, тувулунагъан имканлыкъланы спортчу толу кюйде къоллап болмагъаныны себеплери бирдагъы гёзден гечириле.
Тек шу ерде спортчуну гёрмекли уьстюнлюклеге, инг алда чыдамлыкъ да, чарчымлыкъ да элтегени гьакъда билдирди.
– Гертисин, тюзюн айтгъанда, шо хасиятлар Шарабутдинде бар, – деп тамамлады ол оьзюню сёйлевюн.
Оьтгерилген ёлугъувну ахырын эте туруп, Шарапутдин Атаев адамны къаркъарасындан къайры да, хасият-битимин, ругьун чыныкъдырагъангъа торайып гелеген яш наслугъа савлукъну беклешдирмек учун да спортну къайсы буса да бир журасы булан машгъул болмакъны насигьатын этди. Оьзюне берилген имканлыкълар булан пайдаланып, къумукълагъа кёп яхшылыкълар булан бирге бары да асил муратларын яшавгъа чыгъармакъны да ёрады.
Къайпанмайлы сен узат!
(Боксдан дюньяны чемпиону
Шарапутдин АТАЕВГЕ)
Яр яврунлу улансан,
Тартсанг, бугъав уьзеген.
Гюбе йимик тёшюнгню
Алтын медаль безеген.
Гюнге бакъса, ланс этип,
Йыртыллай ер-еринден.
Гьар оьрлюкге ёл къыйын,
Тюшмегенсен тёрюнден.
Билемен, ёл алгъансан,
Ярышларда чыныгъып.
Тёкгенсен бетингден кёп
Тузлу терни къаныгъып.
Юмуругъунг тиедир
Болатдай от чачагъан.
Ургъанынг чегелешип,
Топ тийгендей къачагъан.
Тогъатартагъан сени
Терегингден титирей.
Сени енгип болагъан
Бирев ёкъну гертилей.
Кютгенсен Дадайынга
Яшда берген антынгны.
Сав дюньягъа билдирдинг,
Шарапутдин, атынгны…
Гележекде де шулай
Къайпанмайлы сен узат!
Ярашсын чемпион деп,
Айтылагъан сыйлы ат!
