·      

 

Суйдух Убайдуллаевна Атаева белгили муаллим-ярыкъланды-рывчу, язывчу Убайдулла Шагьманаевич Батырмурзаевни агьлюсюнде тувгъан. Оланы агьлюсю 7 яшны оьсдюрген ва барысы да оьр билим алгъан.

 

Суйдух Убайдуллаевна атасыны ёлун, ана тилни муаллимини касбусун танглагъан. Муаллимни касбусу бек жаваплы, къыйын ва абурлу касбу экенге барыбыз да мюкюр болабыз. «Гьар адам ана тилин, милли адатларын ва халкъны асил мердешлерин билмесе ярамай. Оланы билмейген адам гьакъы­лын тас этген, оьтген тарихине арт берген, ругь якъдан оьсмейген адамгъа ошай» деген пикруланы Суйдух Убайдуллаевна гьар заман айта. Гертилей де, оьзюню ишин сюймейген адам, яшлагъа дарс берип, ана тилини увуз татывун сезме, адабиятыны тюгенмес байлыгъын гьис этме, балдай татли тилин уьйретип, яшланы сююп де болмайдыр. Ол шо сюювюн яшлагъа да сингдирип, етишдирип къаст этип ишлей.

Суйдух Убайдуллаевна оьзюню бары да яшавун школагъа, яшланы охутувгъа ва оланы тарбиялавгъа багъышлагъан, оьзюню оьмюрюню аслам янын школагъа берген.

Школа ва яшлар − ону яшаву ва къысматы. Бу къумукъ къыз Дёргели юртда 1975-нчи йылда тувгъан. Ол школаны оьр къыйматлагъа да битдирип, Дагъыстан пачалыкъ университетни дагъыстан ва орус адабият бёлюгюне охума тюше. Ону 1992-нчи йыл тамамлап, ата юртуна къайта. 1993-нчю йылда Дёргелидеги бир номерли орта мактапгъа ана тиллени муаллими болуп ишге къабул этиле.

Суйдух Убайдуллаевна ишине берилип, къаны-жаны булан къасткъылып чалыша, оьзгелеге де уьлгю гёрсете. Ол ишлеме башлагъан биринчи гюнлерден тутуп, ишине белсенип гиришген, буссагьатда да шо кюйде давам эте. Эртенден ахшам болгъанча, ахшамдан геч болгъанча тангалагъы дарслагъа гьазирлик гёре туруп, гечорта болгъанны да эс этмей къала.

Ишине намуслу янашып уьйренген Суйдух Убайдуллаевна йылдан-йылгъа ишинде гьюнерин ва сынавун артдыра туруп чалыша. Ону къастлыгъы иш ёлдашларыны арасында да белгили. Оьзю де тюнегюн дегенлей шо партаны артында олтургъан, муаллимлени гьалын-хасиятын бек яхшы билеген Суйдух Убайдуллаевна, гьеч бирев де себеп табып болмасдай, оьзюне бек талаплы янаша ва билимлерин даим артдыра туруп чалыша.Ону охувчуларыны ва иш ёлдашларыны арасында да уллу абуру ва гьюрмети бар. Бажарывлу муаллим оьзю береген дарслар булан дазуланып къалмайлы, дагъы да къошум ишлер юрюте. Демек, школада ана тил дарсланы муаллимлерини методика бирлешивюню ва 5 «б», 10 «а» класны ёлбашчысы да дюр.

Суйдух Убайдуллаевна яшланы ана тил ва адабият дарслагъа иштагьын артдырма къаст этегени ачыкъдан гёрюне. Милли адабиятгъа багъышлангъан ачыкъ дарслар оьтгере. Ону охувчулары район ва республика олимпиадаларда ортакъчылыкъ этип, биринчи ерлеге ес болуп, муаллимин сююндюре.

Бу йыл «Ана тиллеге − экинчи тыныш» деген конкурсда Суйдух Убайдуллаевнаны охувчу къызы Фатимазагьра Атаева республика оьлчевде биринчи ерни алды. Сонг да, бу йыл ону охувчулары район даражада ана тилден оьтгерилген олимпиадада 1, 2, 3-нчю ерлени къазанды.   Булар − гёрмекли натижалар.

Суйдух Убайдуллаевна гьар даим де охутув программагъа ва янгы охув къайдалагъа, талаплагъа гёре охувчуланы билимин, оланы дарсны уьйренивге иштагьлыгъын­ артдырывгъа айрыча агьамият бере. Олар булан гьар тюрлю конкурслар, КВН-лер оьтгере, сочинениелер, рефератлар яздырта, тамгазетлер онгара. Яшланы ана тил ва адабият дарслагъа англавун артдырмакъ мурат булан дарсда гьар тюрлю янгы къайдаланы къоллай.

    Иш борчларымны кюте туруп, Суйдух Убайдуллаевнаны 6-нчы класда адабиятдан оьтгерилеген «Абусупиянда − къонакълыкъда» деген дарсына къаршы болдум. Суйдух Убайдуллаевна бу дарсны бек къужурлу къайдада оьтгерди.

Дарсда интерактивный доскада Абусупиянны сураты, юртну гёрюнюшю, баву, бавдагъы къушланы тюрлю чарнавлары булан шаирни оьмюр баянлыгъы гьакъда оьзю хабарлай турду. Сонг да, яшлагъа муаллим: «Абусупиян бирдагъы терек орнатгъан ва огъар «Къылыкъ китап» деп къойгъан», – деп англатды. «Бу терекни емишлерин сююп ашагъанлар яхшы къылыкълы бола», – деди.

Озокъда, булай дарсланы ана тилни муаллимлери ара бёлмей оьтгерме герек. Дагъы ёгъесе ана тил дарсланы яшлагъа сингдирмеге къыйын. Бу муаллим жагьлыгъы­ны, ассилигини гючюнден ишини къыйынлыгъын да олай артыкъ эс этмей, юртдагъы гьар тиштайпа йимик, уьй-абзар, бав къуллукъланы да кютмеге заман таба.

Суйдух Убайдуллаевнагъа 2010-нчу йылда «Дагъыстан Республиканы ат къазангъан муаллими» деген ат берилген, ол оьр даражалы муаллим де дюр.

Билим берив ожагъыны янындан да грамоталар булан савгъатлангъан.

Гьар гюн школагъа гелип, оьз­лер охутагъан яшлагъа юрегини пайын багъышлайгъан муаллимлеге баракалла болсун!