Оьтген жумада Магьачкъаладагъы Поэзияны театрында белгили къумукъ шаир Жаминат Керимованы 75 йыллыгъына багъышлангъан эсделик жыйын оьтгерилди. Шонда ону таныгъанлар ва къатнагъанлар булан бирге, дос-къардашы, юртлардан гелгенлер, замандашлары, белгили шаирлер де ортакъчылыкъ этдилер.
Жыйынны юрютген Дагъыстанны Язывчуларыны союзуну къумукъ бёлюгюню ёлбашчысы, Дагъыстанны халкъ шаири Шейит-Ханум Алишева Жаминатны гьакъында къысгъаракъ маълуматлар берди ва бир нече шиърусун охуду.
– Бираз алда эди Жаминатны 70 йыллыгъын этген эдик. Арадан 5 йыл гетип де битди. Ол арабызда ёгъу буса 13 йыл бола, тек ону аты унутулмагъан, гьар хабарыбызда, гьар жыйыныбызда шо къатты хасиятлы къызны биз эсгермей къоймайбыз, – дей Дагъыстанны Язывчуларыны союзуну председатели, Дагъыстанны халкъ шаири Марина Агьматова-Колюбакина.
– Расул Гьамзатовну 100 йыллыгъына багъышлангъан чаралар юрюлюп турагъанда уллу шаирни ва «Таргъуну гёзел къызы» Жаминатны арасындагъы дослукъну айтма сюемен. Расул Жаминатны янына кёп керенлер баргъан, огъар шиъру да багъышлагъан. Бир керен барып гелгенде ол магъа: «Жаминатгъа къатнай туругъуз, болагъан кёмекни этигиз», − деп тапшургъан эди. Тапшурув дослукъгъа айланды, биз кёп йыллар къурдашлыкъ юрютдюк. Таза адам да дюр эди, демли столу йимик оьзю де берекетли эди. Ол гечингенден сонг ону «Сайламлы асарлары» деген китабы чыкъды. Гьали китапланы тиражы аз чы, бары да халкъгъа етишмей, шону учун да школадагъы яшлагъа ана тиллени дарсларында, шолай пагьмулу шаирлени гьакъында хабарлай турма герек…
Дагъыстанны халкъ шаирлери Бийке Кулунчакова ва Аминат Абдулманапова Жаминат булан хоншулар болгъанны ва шо заманда болгъан къужурлу ишлени гьакъында айтдылар. Сонг олар Жаминатгъа багъышлангъан ва ону оьзлени тиллерине гёчюрюлген шиъруларын да охудулар.
Шолай да, жыйында ону булан тыгъыс аралыкълар юрютген ва уьюне къатнагъан «Тангчолпан» ва «Къарчыгъа» журналланы редакторлары Супиянат Мамаева ва Насрулла Байболатов, Таргъудагъы 19-нчу школаны директору Камалутдин Мажитов, къурдашы Хадижат Жанболатова, Бабаюртдагъы «Тангчолпан» деген маданият центрны ёлбашчысы Садия Метеева, шаир Мадиш Мажитова ва башгъалары шаир булан къурдашлыкъ юрютген йылларын къужурлу кюйде хабарладылар.
Сёйлевлер Жаминатны сёзлерине гёре язылгъан йырлар булан къатнашдырылып юрюлдю. Биринчилерден болуп Жаминатгъа оьзюню йырын кёстекли йырав Сайдулла Амирханов багъышлагъан. Жыйында Россияны ат къазангъан артисткасы Бурлият Элмурзаева, Дагъыстанны халкъ артисткалары Зайнап Абсаматова, Рукъуят Гьамзатова, Зоя Чунаева ва Хадижат Ибрагьимова йырлап, жыйылгъанланы гёнгюн алдылар. Таргъу школаны охувчу къызлары буса Жаминатны шиъруларын охудулар.
− Биз Жаминатны неге сюебиз деген сорав тувулунмай къалмай. Неге тюгюл де юрюме гьасирет тургъан Жаминат аврувуна бойсынмагъан, осал болмагъан, − дей оьзюню сёзюнде «Ёлдаш» газетни баш редактору Гебек Къонакъбиев. – Ойлашып къарагъанда, юрюп болмай къалгъанлар юзлер-минглер де бардыр, тек Жаминат юрюп болагъан адамлардан артыкъ иш этген. Школаны битдирген, оьр билим алгъан, къызъяшны тарбиялагъан, 16 китап чыгъаргъан. Эки аягъына юрюп болмас аврув берсе де, къысмат огъар эки къанат, пагьму-рагьму берген. Къыйынлыкълагъа къайпанмай яшагъан. Камал Абуков бир макъаласында Жаминатны ташны ярып чыкъгъан чечекге тенглешдирген.
Оьзю яшавдан гетсе де, аты ва хаты халкъ арада яшай, асарлары охула, унутулмай. Гетген адамны аты эсгерилмей буса, шо, гертиден де, яшавдан гетген бола деп айта. Жаминатны аты эсгериле ва шиърулары бугюнлерде де охула…
Гьар сёйлеген адамгъа гюл байламлар берип турагъан къыз Жаминат тарбиялагъан Камилла деген къыз экени жыйынны ахырына таба белгили болду. Жыйылгъанлагъа Бурлият Ибрагьимованы атындагъы фондну председатели Сакинат Магьмутова да бек разилик билдирди.
Жаминат Керимованы эсделик жыйынын оьтгергенлеге ва гелгенлеге дос-къардашлары да разилик билдирди.
