Хумторкъали район къурулуп ишлемеге башлагъанлы, бу йыл май айны 6-сында 30 йыл битежек. Дагъыс­тан Республиканы Министрлер Советини 1993-нчю йылны май айыны 6-сында чыкъгъан 86 номерли къарары булан Укарханов Шамил Абдурашитовични, Хумторкъали районну къурулувуну къурум комитетини председателини къуллукъ-ларындан эркин этип, Хумторкъали районну администрациясыны башчысы этип белгилей ва бир айны ичинде район администрацияны бёлюклерин къурмагъа тапшурув бере.

Ш. Укарханов районгъа гелген биринчи гюнюнде «Марковский» сов-хозну бухгалтери Гьабит Бамматовну оьзюню янына ча­къыра ва янгы къурулгъан районну бухгалтерини ишин тапшура. Район администрацияны бёлюклери къурулмагъа башлай. Финанс бёлюгю де ачыла. Бираз заманлар район администрацияны бухгалтери болуп ишлеген сонг, Гьабит Шамил Абдурашитовичге финанс бёлюгюне баш бухгалтер болуп чыкъмагъа сюегенин англата. Гьабит пенсиягъа чыкъгъынча, 2009-нчу йылгъа ерли, финанс бёлюкню баш бухгалтери болуп ишлей.

 – Гьабит, 1993-нчю йылда къурулуп ишлемеге башлагъан Хумторкъали район администрацияны финанс бёлюгюню баш бухгалтерини къуллугъун кютюп турдунг. Янгы къурулгъан район администрация не йимик четимлик-леге къаршылашды? Бу йыл район администрациясы къурулгъанлы 30 йыл бола. Шо йылланы гьакъында хабарласанг арив болар эди.

– Хумторкъали район администрация 1993-нчю йылны май айында ишлемеге башлады. Район администрацияны башчысы Шамил Укарханов юртдагъы совхозну бир гиччи кабинетинде ерлешди. Шо кабинетде Шамил Абдурашитович булан мен де олтура эдим. Район администрацияны бёлюклери къурулгъанчагъа админис­трацияны бухгалтерини ишин юрютюп турдум. Финанс бёлюгю ачылгъанда онда баш бухгалтер болуп чыкъдым.

Янгы район къурулагъанда биринчи къыйын масъала – район админис­трацияны къуллукъчуларына олтурмагъа ер ёкълугъу эди. Хум-торкъали район администрацияны башчысы Шамил Укарханов ишни тюпден-ерден къуруп юрютдю: бёлюклерини ёлбашчылары этип иш сынаву бар касбучуланы танглады ва ишде кёп чалышмагъа тюшдю. Арадан бир ай гетип, район администрацияны бёлюклерине бажарывлу, касбу сынаву булангъы ёлбашчылар салынды.

– Район администрацияны финанс бёлюгюню баш бухгалтери болуп ишге тюшгенче не къуллукъларда ишлегенсен?

– Мен 1964-нчю йылда Хумторкъалиде сегиз класны битдирип, Буйнакск шагьардагъы финанс техникумгъа охумагъа тюшдюм. О йылларда Хумторкъалиде сегиз клас тюгюл ёкъ эди. 1967-нчи йыл техникумну битдиргенде, асгерге ча­къырылып гетдим. Асгерде эки йыл къуллукъ этип, 1969-нчу йылда ата юртум Хумторкъалиге къайтгъанда, ишге тюшмеге «Марковский» совхозну директору Юсуп Гьажакъаевни уьстюне бардым. «Юсуп Татаевич, Буйнакск шагьардагъы финанс техникумну битдиргенмен, сизде совхозда иш бар буса, ишлежек эдим», – деп, къыйынымны айтып, не жавап берир экен деп пысып токътадым. Бир де эсимден таймай Юсуп Гьажакъаев мени ишге алгъан кюю. Ол сов­хозну баш бухгалтерин де, партия къурумну секретарын да, ишчи комитетни председателин де, юрт советни председателин де чакъырды. Аз заман да гетмей, дёртевю де совхозну директоруну кабинетине гирип гелди. «Шу уланны таныймысыз, финанс техникумну битдирген, совхозгъа ишге тюшмеге сюе», – деп, Юсуп Гьажакъаев ча­къырылып гелгенлеге соравлу къарады. Совхозну ишчи комитетини председатели Ажай Сулейманова гелгенлени арасында биринчилей: «Бек арив таныйбыз. Яхшы янындан. Илмияминни уланы», – деп макътап алды. Оьзгелер де Ажайны сёзлерин гертиледи. Юсуп Гьажакъаев жыйылгъанланы барысына да тынглап: «Яш специалистлени ишсиз къоюп болмайбыз. Алайыкъ ишге», – деп, совхозну баш бухгалтери Ягьия Ягьияевге ишге алмагъа тапшурув берди. 1969-нчу йылда асгерден къайтгъанда «Марковский» совхозда старший бухгалтери гьисапда иш башладым. «Марковский» сохозда ва Хумторкъали район администрацияны финанс бёлюгюнде 40 йыл ишлеп, 2009-нчу йылда пенсиягъа чыкъдым.

Гьабит Бамматов тухум-тайпаны ичинде де охугъан, билим-касбу алгъанланы да биринчиси эди.
Гьабитни ишге тюшгенин англап, атасы Илмиямин уланына этген насигьат-буварыву бугюн де ону яхшы эсинде къалгъан.

«Уьстюнге гьар тюрлю къуллукълары болуп уллу да, яш да гелир. Уллу-гиччи къуллукъ буса да, языв-бузув столну артында олтургъансан. Мен «гьакиммен» деп айтып, оьзюнгню оьр тутма. ­Уьстюнге ким гирип гелсе де, гелген адамны олтургъан ерингден хозгъалып, туруп къабул эт. Бола туруп, къуллугъун битдирмей чыгъарма», – деген атасыны насигьатларын Гьабит гьали де унутмай.