Янгы охув ожакълар ачыла


Къызылюрт районну Гелбах деген юртунда 2009-нчу йылда ишленме башла­гъан школаны къурулушу тамамлангъан.


 


Эсгерилген школаны директору Зазай Хизриеваны сёзлерине гёре, 9 йыл алда, гьали янгы школаны бинасы токътагъан ерде заманлыкъгъа этилген иссилик береген ери де булан охутув бина къурулгъан эди. Харж гёрсетилмейгенликни себебинден, къурулуш ишлер о заман токъталгъан. Гьали Дагъыстан Республиканы Башчысыны ва Гьукуматыны Администрациясыны ёлбашчысы Владимир Ивановну якълаву булан школа къурулуп битген.



–Владимир Валерьевич бизин школагъа бир нече керен гелди. Къурулушну гьалын ахтарды. Бу йылны июн айында къурулуш ишлер янгыртылды. Яшлар кёпден къаравуллагъан спортзал къурулду. Шолай да янгы котельный, волейбол ойнайгъан майданча ва башгъа тарыкълы имаратлар къурулду.



Зазай Хизриеваны айтывуна гёре, школада 247 охувчу билим ала ва 30 муаллим чалыша.



Бирдагъы бир къурулушу узатылгъан школа Хасавюрт шагьарда да ачылгъан.



Шагьарны «Балюрт» деген юртунда ерлешген спорткомплексни къурулушу 2009-нчу йыл октябрь айда башлангъан болгъан. 2014-нчю йылда харж гёрсетилмейгенни себебинден токъталгъан.



Спорт комплексни волейбол, баскетбол ойнайгъан майданчалары, теннис корту ва спортну башгъа тюрлю журалары булан яшлар машгъул болсун учун тарыкълы ясандырывлары бар. Бу йыл спорткомплексни тамамламакъ учун 33 миллион манат берилген. Ону тамамламакъ учун 71 миллион харжлангъан.



Янгы охув йыл башлангъынча къурулушу узатылгъан школаланы дагъы да 6 ерде тамамлама гёз алгъа тутулгъан. Шолайлыкъда, республикабызны школаларында дагъы да 1500 охув ер болажакъ.



Гьар тюрлю йылларда къурулушлар харж ёкълугъуну себебинден токъталгъан болгъан. Бугюнлерде буса шо ишлер токъталмай юрюлюп тура.



«Билим беривню оьсювю» деген пачалыкъ программагъа гёре къурулушлары узатылгъан биналаны тамаламакъ учун 456 миллион манат гёрсетилген.



Авторизация
*
*
Регистрация
*
*
*
Согласны с условиями сайта?
Генерация пароля