Касбусу – Ватанны якълавчу

Дюньяда нече тюрлю касбулар бар, амма оланы арасында айрыча ерни тутагъан касбу – Ватанны якълавчусу. Ватанны якъламакъ – гьар ватандашны алдында токътагъан сыйлы борч. Асгерде къуллукъ этеген адам оьзгелерден эркеклиги, къоркъув билмейгенлиги, къоччакълыгъы ва оьктемлиги булан айырыла. Асгерчи Ватаны ва халкъы саялы жанын бермеге де гьазир.

Шо хасият бизде гьар заманда да макътала гелген ва олардан гьаман да оьктем болгъанбыз, олагъа тенг болмагъа къаст этгенбиз. Йыллар гетген булан да Уллу Ватан давда элибизни эркинлигин якълагъан къагьру-манларыбызны атлары унутулмай, олар этген къурбанлыкъ нас­лудан-наслугъа яшай. Бугюн де Ватаныбызны дазуларында давну ели гене эше, гене халкъыбызны къоччакъ уланлары душман булан бетге-бет ябушалар.

Бир вакътилерде тюбюне ерли ёкъланмагъан фашизм гене тамурлашып, уьлкебизни дазуларына ювукъ болду. Огъар къатты юмуругъубузну урмасакъ бажарылмайгъан ерге етишдик. Донбас бойда юрюлюп тура­гъан хас дав чарада бугюн бизин якълы уланлар, гьалиден 80 йыллар алда йимик, Ватаныбызны бары да миллетлерини вакиллери булан бир сыдырагъа туруп, фашизмни дагъытывун узаталар.

Бизин райондан дав чарада ортакъчылыкъ этеген яшланы санаву 200-ге етишген. Оланы арасында дав майданда гёрсетген къоччакълыгъы учун орденлер ва медаллар булан савгъатлангъанлары ­ында язмагъа сюеген адил­янгыюртлу Гьажи Гьажиев де – шолайланы бириси.

Гьажи Гьажиев – 1991-нчи йыл январ айны 1-нде адилянгыюртлу Рашитни ва Фариданы агьлюсюнде тувгъан авлетлени уллусу. Шогъар буса да ярай, Гьажи яшдан тутуп чарчымлы, не ишни де башына алмагъа къоркъмайгъан улан болуп оьсе. 2008-нчи йылда ерли школаны битдирген сонг, ол Магьачкъаладагъы Дагъыстан пачалыкъ педагогика университетни физкультура бёлюгюню уьйде туруп охуйгъан къайдасына тюше. 2009-нчу йылда буса ол асгерге чакъырыла. Ватандаш борчун Гьажи Гьажиев Тула областыны Белев шагьарында ерлешген инженер-сапёр полкунда кюте. Бир йыл къуллукъ этген сонг, ол ата юртуна къайта.

– Асгерден къайтгъан сонг, Россияны Савутлу Гючлери булан дыгъар байлап, асгерлик къуллугъумну узатмагъа токъташдым, – дей Гьажи Гьажиев. – Гьакъыкъатда шо умутумну яшавгъа чы­гъармакъ учун йыл гетди ва 2010-нчу йылда дыгъар байладым, сонг Мычы­гъыш Республикада асгерлик борчумну узатмагъа гиришдим.
Башлапгъы уьч йылны боюнда Гьажи Гьажиев Мычыгъышдагъы Ханкъала юртундагъы асгер бёлюкде, 2013-нчю йылда буса ону «Калиновская» деген станциягъа чыгъара ва онда бугюнге ерли къуллукъ эте.

Къырым ярыматавдагъы къуллугъу

2014-нчю йылда Украинада тыш уьлкелени къастлыгъы булан алышыныв болгъан сонг, Гьажи Гьажиев къуллукъ этеген асгер бёлюкню Къырым ярыматавда ерлешген Россияны Къараденгиз флотуну миллетчилерден аманлыгъын болдурмакъ учун Севас­тополь шагьаргъа бакъдыра. Бизин асгерчилер ярыматавну тамур ташлап турагъан

 фашизмден сакъламагъа чы нечик де болалар, олар ярыматавда шо йылны март айында оьтгерилген референдумну да уьстюнлю кюйде оьтгеривге тенгсиз къошум этелер. Гьакъыкъатда бизин асгерчилер Россияны ва дюньяны тарихине «яшыл адамлар» деген ат булан гирелер ва шону булан Къырым ярыматав даимликге Ватанына да «къайта». Шо йылны март айыны ахырында Гьажи Гьажиев «Къырымны къайтаргъаны учун» деген медаль булан савгъатлана.

Биринчи савгъат

Буса да, фашизмни тору Донбасны топурагъына да яйылмагъа башлай. Ерли халкъ огъар болгъан чакъы къаршы турмагъа къаст эте. Дав башлана. Парахат турагъан халкъны яшаву бютюнлей алышына. Россия ерли халкъгъа къардаш къолун узата.

Шо йылны яйында Гьажи Гьажиев яшыртгъын хас чарада да ортакъчылыкъ эте. Берилген тапшурувну кютювде ол дав ёлдашлары булан атышывгъа тюше, тобугъуна топ яркъыч тие. Авур ярасына да къарамай, Гьажи Гьажиев душмангъа къаршы турувун узата, машини булан дав ёлдашларын атышыв юрюлюп турагъан ерден къоркъунчсуз ерге алып чыкъмагъа бажара. Шону булан ол оьзюню де, ёлдашларын да оьлюмден къутгъара.
Госпитальда Гьажи узакъ ята, яралары сав болуп, оьзю къуллукъ этеген асгер бёлюкге, дав ёлдашларыны янына къайта.

Яшыртгъын хас чарада Гьажи Гьажиев гёрсетген къоччакълыкъ командованиени янындан да тергевсюз къалмай: 2014-нчю йылны октябр айыны 28-нде Россияны Президенти Владимир Путинни Указына гёре яшыртгъын тапшурувну яшавгъа чыгъарывда гёрсетген игитлиги саялы ол «Къоччакълыгъы учун» деген медаль булан савгъатлана.
2022-нчи йылны 24-нчю февралында Россияны Президенти Владимир Путин Украинагъа къаршы хас дав чара башлангъанны билдирди. Шо гюн Гьажи Гьажиев асгер борчун кютеген 58-нчи армия Донбасны халкъын фашистлерден къоруп сакъламакъ учун йибериле. Шо гюн асгер Запорожск областны Мелитополь шагьарын азат этип, алгъа ёлун узата.

Экинчи гюнге бизин асгерчилер Токмак шагьаргъа да ювукъ болалар. Душман ёл булан гетип барагъан бизин асгерге арекден топлар булан урмагъа башлай. Атышывдан къачмакъ муратда техниканы гери бурмагъа буйрукъ геле. Арадан аз заман гетгенде, младший сержант Гьажи Гьажиев дав ёлдашларыны бир бёлюгю колоннадан артда къалгъанны эслей ва кёп ойлашмай, машинин гери бура. Шо вакътиде топ Гьажини ювугъунда атыла, гёзлерин къарангылыкъ яба, амма тез эсин табып, машинни газына баса. Насипге, топну яркъычы огъар тиймей, амма контузия ала. Ярылагъан яркъычлагъа да къарамай, Гьажи ёлдашларын таба ва оланы, машинге миндирип, къоркъунчсуз ерге чыгъармагъа къарайгъан вакътиде, ювукъда бирдагъы топ да атыла. Аз заманны ичинде эки керен контузия алгъан Гьажи, эсден таймагъан кюйде, къоркъунчсуз ерге чыгъа. Ёлдашларына болгъан ишни англатып болмай Гьажи эсин тас эте. Дав ёлдашлары гьалны анг­ лап, тезлик булан авлакъ госпитальгъа, ондан таба буса Гьажини Къырым ярыматавгъа гёчюрелер.

«Буса да бизин яшлар Токмак шагьарны шо гюн алдылар. Бизинкилер дав савутлар булангъы складланы атылтгъан сонг, душман артгъа тайыш­магъа ва къачмагъа башлады», – дей Гьажи Гьажиев, – амма ол оьзюню къоччакълыгъы булан 25 де ёлдашын оьлюмден къутгъаргъанны айтмагъа сюймей.

Уллатасыны ёлу булан

«Мен оьзюмню ватандаш борчумну кютдюм. Мени уллатам Абдулнасир Гьажиев Уллу Ватан давда, фашистлени къува туруп, Ватаныбызны эркинлиги саялы жанын къурбан этген. Биз де, фашизмден уьст гелгенлени варислери, ону ёкъ этме гене къаст этмеге герекбиз. Ёгъесе, уллаталарыбыз бизден гечмес», – деп къошду Гьажи Гьажиев.

Шо гюн алгъан контузиялар Гьажи Гьажиевни савлугъуна заралсыз гетмеген. Арадан йыл гетген, ол буса гьали де савлугъун къайтара. Оьзю де билмей, тили тутула, гёзлерин юмса, шо атышывлар гёз алдына гелип токътай.

Ватан оьзюню къоччакъ уланларын унутмай. Украиналы фашистлер булан ябушувда гёрсетген къоччакълыгъы саялы Гьажи Гьажиевни Россияны Президенти Владимир Путин экинчилей де «Къоччакълыгъы учун» деген медаль булан савгъатлагъан. Оьрде эсгерилген медаллардан къайры да, Гьажи Гьажиевни тёшюн «Кавказда къуллугъу учун» деген белги ва «Дав къуллукъда оьзюн гёрсетгени учун» деген медаль безей.

Буса да, Гьажи Гьажиевни уллу байлыгъы – ата-анасы, агьлюсю ва авлетлетлери. Ол оьзюн артыкъ макътагъанны сюймей, оьзденлигин сакълай ва яшавгъа умутлу къарай.

«Биз тюзлюкню яныбыз, – дей Гьажи Гьажиев, – биз утмагъа да герекбиз. Дагъы ёгъесе, бажарылма да бажарылмай».

Авторизация
*
*
Регистрация
*
*
*
Согласны с условиями сайта?
Генерация пароля