Яшланы якълавуну гю­ню саналагъан 1-нчи июнда бизин Буйнакск районну Капиркъумукъ юртунда 120 гиччипавгъа ери булангъы янгы къурулгъан яшлар бавуну ачылыву оьтгерилди. Яшлар бавуну янгы бинасы юртну къап-ортасында, гьар къайсы ягъындан да кёп тюрлю онгайлыкълары булангъы майданчада ерлешген.

Россияны оборона министерлигини тувра ортакъчылыгъы ва гьай этивю булан къурма гёз алгъа тутулгъан яшлар бавуну бинасыны къурулуш ишлери уьч йыл бою юрюлдю. Гиччипавланы байрамы – Яшланы якълавуну халкъара гюнюнде республикабызны тахшагьары Магьачкъаладан, Буйнакск райондан гелген кёп санавдагъы къонакъланы ортакъчылы­гъы ва юртдагъы яшланы оьтесиз къужурлу чы­гъыш­лары булан бек арив оьтгерилди.

Гелген къонакъланы арасында Дагъыстан Республиканы Пачалыкъ секретары Магьамматсолтан Байболатович Магьамматов, Буйнакск районну башчысыны борчларын заманлыкъгъа кютеген Уллубий Магьамматович Ханмурзаев, районну бёлюклерини къуллукъчулары, школаланы ва яшлар бавларыны кёп санавдагъы вакиллери бар эдилер.
Байрам мажлисге гелгенлени къутлап айтгъан сёзлеринден сонг, ДР-ни Пачалыкъ секретары Магьамматсолтан Магьамматов ва районну башчысыны борчларын кютеген Уллубий Ханмурзаев ал лентни гесип, яшлар бавун ачалар
.
– Буссагьатгъы вакътиде бизин Капиркъумукъ юрт администрацияда 6800-ге ювукъ адам яшавлукъ эте деп юрюле. Шо буса районда ерлешген кёп халкъ яшайгъан уллу юртланы арасында бешинчи ерде болуп токътай. Юртда 1980-нчи йылдан сонг къурулуп пайдаландырывгъа берилген 320 яшгъа ери булангъы орта билимлер береген школаны бинасы да бар. Бугюнлерде эсгерилген школагъа охума юрюйгенлени санаву 650-ге тармашып тура. Яшланы охутув-тарбиялав иш нечакъы бола буса да тыгъыс шартларда оьтгериле. Яшлар бавуна юрюме чагъы етишген гиччипавланы санаву 300-ден кёбокъ артыкъ, – деп хабарлай мени булан лакъыр эте туруп, юртну башчысы Абдурагьман Алхлаев талчыкълы гьалда. – Озокъда, булай уллу масъалалар аз заманны ичинде чечилип къалмай, – деп узата ол лакъы­рын. – Гележекде этилежек ишлени алданокъ гёз алгъа тутуп, энниден сонг сама да шолар тюзевлю чечилме болагъан ёлланы ахтарып, яшавгъа чыгъарма белсенип чалышма умут этебиз.

120 гиччипавгъа къурулгъан янгы яшлар бавуну бинасында тийишли алатлар булан ясандырылгъан физкультура, музыка заллар, айрыча саниятлагъа уьйретеген, аш этеген, ойнайгъан, ял алагъан ва дагъы да кёп башгъа тюрлю кабинетлер бар.
Шо гюн Капиркъумукъда яшлар бавуну гьар-бир ягъындан мекенли этилген тийишли къураллар, алатлар булан ясандырылгъан янгы бинасын пайдаландырывгъа беривге багъышлангъан шатлы байрам гиччипавланы да жагь ортакъчылыгъы булан эки сагьатгъа ювукъ заман узатылды. Шо, гертиден де, кёпден къаравуллангъан сыйлы савгъат йимик болуп токътады.