Адамны савлугъу болмаса, турагъан, яшайгъан еринг шиша къалалар буса да гёзюнге гёрюнмей. Кёплер дагъы амалы ёкъ заманда савлугъуну гьайын этмеге гиришелер. Дарманланы къоллама сюймейгенлер халкъ медицинадан кёмек излей, шогъар таяналар.

Кёплер къаныбыз (гемоглабин) аз деп кантыллайлар. Не ашаса, не зат этсе ерине, оьзюню нормасына гелтирме бола экен деп сорайлар.  Шону гьар тюрлю ашамлыкъланы гючю булан эбинден гелме бола.  Шулай бир нече ёравланы таклиф этебиз.

200 грам къозашны, шо оьлчевде гречканы да алып, ун йимик увакъ этесиз. Шогъар 200 грам авур тюсдеги балны къошуп булгъайсыз. Шо гьазир этген дармандан эртен ач къарынгъа ашагъанча ярым сагьат алда эки ашкъашыкъны къоллайсыз.  Сув булан ичме ярамай.

Дагъы да эсгерсек, къозну да, къуругъан кюрегени де, кишмишни де теппе-тенг этип аласыз, уьчюсюн де  увакъ этип, шоланы оьлчевюнде бал къошуп бирикдиресиз. Шону гюнде уьч керен бир ашкъашыкъны ашайсыз.

Кюрегени, къара коканны, къозну, кишмишни айырып, шоланы гьарисинден бирер стаканны аласыз.  Эки лимонну къабугъу булан блендерден чыгъарып увакъ этесиз. Шоланы барын да бир затгъа тёгюп, уьстюне бир стакан бал да къошуп булгъайсыз. Шону гюнде уьч керен бир ашкъашыкъны ашайсыз.

П. ГЬАЙБУЛЛАЕВА.