Дагъыстандагъы бусурманлар, шоланы ичинде къумукълар да, шапии мазгьапны юрютегени белгили. Дёрт мазгьапны бирисини кюрчюсюн салгъан имам аш-Шапии зор билими булангъы алим, итти гьакъыллы инсан ва ажайып асил къылыкълы адам болгъан. Аллагьны алдында оьр даражалы адамлар арив къылыгъы булан белгилене. Хасиятларыны къыйматлы янланы бириси чомартлыкъ да дюр. Имам аш-Шапии де тамаша кюйде генг къолу булангъы инсан болгъан. Шону ачыкъдан гёрсетеген, болгъан бир ишни суратлайыкъ.

Байрам гюн етишген, имам аш-Шапиини къолунда буса бир диргьамы да болмагъан. Къатыны огъар къардашларындан борчгъа бираз акъча алма тюшежегин айтгъан. Ол борчгъа етмиш динар алгъан. Шондан да ол шоссагьат элли динарны садагъа этген. Шо заман, аш-Шапиини ягъына къурайыш тухумдан бирев гелип, огъар оьзю­ню касип гьалыны гьакъында айтып, кант этген. Имам огъар оьзюнде къалгъан харжын узатып, тарыкъ чыгъын алмакъны таклиф этген. Ол оьзюне имамда бар чакъы харждан артыкъ тарыкъ тюгюлню айтгъан. Имам сабур кюйде, шу харж ол адамгъа буюргъан деп, къалгъан шо 20 динарны берген.

Имам шо гьалында уьйде турагъанда, Жапар бин Ягьия деген бир мадарлы адам, къолуна харж да тутдурдуп, барчы-гелчисин йиберген. Барчы-гелчи имамгъа, оьзюню суалына ол жавап берерми экен деп сорагъан­, имам бережегин айгъан. Ол: «Жапар тюнегюн гече юху учун гёзлерин юмма урунгъандокъ: «Аш-Шапии, аш-Шапии» деген сёзлени эшитген. Тюнегюн сагъа не болгъан эди?» – деп сорагъан. Имам оьзю борчгъа алгъан акъча булан болгъан затны гьакъында хабарлагъан. Аш-Шапииге эки минг динар да берип, барчы-гелчи къайтып гетген.

Магьаммат АБУЕВ