Савлай дюньяда атын данггъа чыгъармагъа бажаргъан спортчуланы бириси гьисапланагъан Жамболат Бижамов яшдан берли оьзю машгъул болуп гелеген спортну бокс журасында лап гёрмекли оьрлюклеге етишген.
Ачыкълашдырып айтгъанда, Жамболат гьар тюрлю йылларда яшёрюмлени ва жагьиллени арасында оьтгерилеген халкъара ярышларда алдынлыкъ алып тургъан. Шондан сонг да, Россияны чемпионатларында дёрт керен утгъан. Европаны чемпионатларында да уьч керен алтын медальгъа лайыкълы болгъан. Дюньяны чемпионатында да гюмюш медаль ва Европаны кубогун да къазангъан.
Артдагъы вакътилерде ол касбучу спорчуланы арасында юрюлеген тогъатар—тывларда да уьстюнлю кюйде ортакъчылыкъ этип геле. Шолай, оьтген жуманы ахырында Уфа шагьарда оьтгерилген турнирде бизин къумукъ улан Жамболат Бижамов оьзю булан 75 кило авурлукъда тогъатартмагъа чыкъгъан Колумбиядан гелген Хуан Нарваэсни енгмеге бажаргъан. Демек, ол оьзюне къаршы тургъан спортчу булан ябушувуну бешинчи тиретинде нокаут булан тамамлагъан. Жамболатдан тиеген къапасланы авурлугъун гётермеге болмай Хуан Нарваэс чёгеленгенде судья ябушувну токътатгъан. Шолайлыкъда, Жамболат Бижамов касбучуланы арасында юрюлеген оьзю оьтгерген экинчи тогъатартывда да алдынлыкъ алгъан.
Биз де Жамболат Бижамовну гезикли уьстюнлюгю булан гьакъ юрекден къутлайбыз. Газетни бары да охувчуларыны атындан яхшы савлукъ булан бирче гележекде дагъы да оьрлюклеге етишмекни ёрайбыз.
Насрулла БАЙБОЛАТОВ
