Гьар адам оьзюню яшавунда бир гьыз, яхшы ишлер къоюп гетген буса, ол замандашларыны, сонггъу наслуланы эсинде даимге къалажакъ. «Бола туруп, гьар заман рагьмулу болугъуз. Рагьмулу болмагъа буса гьар заман имканлыкъ бар», — деген къанатлы сёзлени де уллу маънасы бар. Биревлер оьзюню яшавун рагьмулукъгъа багъышлай. Къайда ишлесе де яхшы ишлер этмеге, айланасында-гъылагъа болагъан кёмегин этмеге къаст эте.
Азнавур Чингисханович Гьажиев де оьзюню бютюн яшавун яхшы ишлеге багъышлагъан. Ол оьзюн рагьмулу, ачыкъ юрекли ва бир заманны ичинде бажарывлу, пагьмулу чалышывчу, гьаракатчы адам гьисапда танытмагъа бажарды. Ону таныгъанлар: къардашлары, къурдашлары, иш ёлдашлары оьтесиз рагьмулу, пагьмулу ва бек бажарывлу адам эди деп эсгере.
Огъар бу йыл июн айны 7-синде 50 йыл битежек эди. Авур аврувдан авруп, 2019-нчу йылны сентябр айында гечинди. Жаны женнетлерде болсун, ятгъан ери ярыкъ болсун. Ол аз яшаса да, асил яшады ва халкъны, замандашларыны эсинде къалагъан кюйде яшап ва чалышып гетди.
Оьзюню загьмат ёлун А.Гьажиев 1995-нчи йылда Дагъыстан педагогика университетде арап тил кафедраны дарс беривчюсю болуп башласа да, чалышывуну кёп янын журналист тармакъгъа багъышлагъан. 1995-нчи йылда Дагъыстан пачалыкъ университетни тыш тиллер факультетин тамамлагъан. 2005-нчи йылда Имам Шамилни атындагъы Кавказны халкъларыны университетинде охуп, филолог, журналист деген касбугъа ес болгъан.
1996-нчы йылларда Азнавур Чингисханович студентлер учун «Арап тилни тарихи» деген китапча да чыгъаргъан ва бугюнлерде де эсгерилген китапчаны университетде охуйгъан студентлер, аспирантлар къоллай.
2004-нчю йылда «Дагъыстан» деген ерли пачалыкъ каналгъа таржумачы гьисапда ишге алына. Ол шо вакътиде къумукъ тилде берилишни де юрютюп тургъан. Шо йылларда Азнавур Чингисханович пачалыкъ каналда орус тилде де бир нече берилишлени арагъа чыгъара. 2006-нчы йылдан башлап, 2008-нчи йылгъа ерли РГВК-ны директоруну заместители, 2008-нчи йылдан 2013-нчю йылгъа ерли генеральный директору болуп чалышгъан.
А.Гьажиев касбу ёлунда аз заманны ичинде гётериле. 2013-нчю йылда Дагъыстан Республиканы маълумат къуралларыны ва печатыны министри этип белгилене. Бу къуллукъда ол 2016-нчы йыл болгъунча чалыша. 2016-нчы йылда Дагъыстан Республиканы Башчысыны ойчусу бола.
2017-нчи йылны май айында Дагъыстан Республиканы Башчысыны ва Гьукуматыны Админист-рациясыны прес-къуллугъуну ёлбашчысыны ишин башлай. 2018-нчи йылда буса «Россия – мени тарихим» деген тарихи парк музейни директоруну къуллугъуна чакъырыла. Азнавур Чингисханович къайда ишлесе де, яхшы натижалар гёрсетме, уьлгюлю ишлеме, Дагъыстангъа ва бютюн Россиягъа пайдалы болмакъ учун гьаракат этмеге бола эди.
Ону шо гьаракаты пачалыкъны янындан да тергевсюз къалмагъан. Ол 2014-нчю йылда Россия Федерацияны Президентини Гьюрметлев грамотасы булан савгъатлана. 2015-нчи йылда Дербент шагьарны юбилей шатлыкъ чараларын оьтгеривде этген уллу къошуму учун Дагъыстан Респуб-ликаны Гьюрметлев грамотасына да лайыкълы бола.
Азнавур Чингисхановични Пачалыкъ савгъатларыны арасында «Дагъыстан» деген республика каналны оьсювюне этген уллу къошуму учун берилген грамотасы да бар. Темиркъазыкъ-Кавказ федерал округну жур-налистлерини бирлешивю Азнавур Чингисханович Гьажиев министр болуп чалышагъан вакътисинде ону «Ачыкъ министр» деген хас савгъат булан белгилеген.
Ол инчесаният тармакъда Дагъыстан Республиканы Пачалыкъ савгъатыны лауреаты болгъан ва жамият байлавлукъланы тармагъында милли савгъат да алма бажаргъан.
Гьар не ишде де ол оьзюн мекенлиги булан бирче гьаракатчы касбучу гьисапда танытды. Оьзюн таныйгъан иш ёлдашлары, минглер булангъы дагъыстанлылар ону рагьмулу, башгъа гишини къайгъысын юрегине ювукъ алагъан, кёмекге къол ялгъамагъа гьазир турагъан, яхшы амаллары булангъы асил адам гьисапда билдилер.
Азнавур Чингисханович тувгъанлы, бу йыл 50 йыл бите. Ол оьзюню артындан къоюп гетген ярыкъ юлдуз йимик гьызы буссагьатда да лансыллап тура ва гьар заманда да ярыкъ юлдуз кюйде ону таныгъан бары да халкъны эсинде къалажакъ. Ону авлетлери ва ювукъ адамлары буса Азнавур Чингисхановичге ошамагъа, ол къоюп гетген варисликни сакъламагъа ва гётермеге къаст этежегине шеклик этмейбиз.
Азнавур Чингисханович булан шо вакъти бирче чалышгъанлар ону адамлыкъ хасиятларын, юрегини ачыкълыгъын гьар заман да кёмекге табылмагъа гьазир кюйде тургъанлыгъын эсгере. Оьзюн гьаким гьисапда тюгюл, иш ёлдашы гьисапда тарыкълы болгъанда насигьат берип, герекли болгъанда кёмек этип, ёл гёрсетип ишлегенин уллу разилик булан эсгере.
Азнавур Гьажиевни
гьакъында замандашларыны эсделиклери
Ариза БАТЫРОВА,
Поэзияны театрыны директоруну заместители:
– Азнавур Чингисханович Гьажиевни ачыкъ, чомарт юреги, яшавгъа уллу сюювю бар эди. Гертилей де, шолай юрегини тазалыгъы, ишге берилгенлиги булан адамланы оьзюне исиндирип бажара эди. Ону янындагъы адамлар да ону янашывуна лайыкълы болмагъа къаст эте эди. Ону юрегинден иссилик, юзюнден буса нюр тёгюлеген йимик эди ва адамланы бек сюйдюрюп бажара эди.
Оьзюню къысгъа яшавунда ол кёп иш этмеге бажарды. Ол тарихни де бек биле эди. Яшавлукъ маданият ва политика алмашынывлагъа сююне эди. Ону чалышыву да элибизни оьсювюне бакъдырылгъан эди.
Оьзюнден сонг асил агьлю де къоюп гетди. Агьлюсю Найида биринден-бири тизив яшлары Зайнапны, Абдулазизни, Айнаны оьсдюре.
Бурлият ТОКЪБОЛАТОВА, «Дагестанская правда» газетни баш редактору:
– Азнавур Чингисханович ишни билеген, адамлар булан сёйлеп, кююн-гьалын ахтарып да бажарагъан, кёп сабур, саламат улан эди. Ол министр болуп турагъанда министерликни ишлери бек яхшы юрюле эди. Мен де онда ишлегенмен ва багьа берип боламан. Ишин теренден биле, адамлар булан сёйлеп бола эди. Кёп арив адамлыгъы булангъы яш эди.
Камила ГЬАМЗАТОВА,
РГВК-ны генеральный директору:
– Азнавурну гьайран яхшы хасияты бар эди. Ол гьар заман иржайгъан кюйде бола эди. Бир заманда да ругьдан тюшюп гёрмегенмен. Нечакъы къавшалса да, иши кёп буса да, гьар заман иржайып турар, шат кюйде гёрюнер эди. Тамаша ичинден гелеген ярыгъы бар эди. Ону гьакъында бирев де кем, яман сёз айтмагъан. Биз иш ёлдашларыбыз булан олтуруп ону эсге алабыз. Гьарибизни Азнавур булан байлавлу бир исси ва масхара шат эсделигибиз бар. Мен ойлашагъан кюйде, оьзюню гьакъында шолай исси эсделиклер къоюп гетмекни уллу къыйматы бар.
Империят ХАЛИПАЕВА,
филология илмуланы доктору:
– Азнавур бизде ишлеген, охугъан. Ону биз студент йимик де, бирче ишлейген иш ёлдашыбыз йимик де таныйбыз. Азнавур ачыкъ юзлю, таза юреги булангъы адам эди. Огъар нечик суал булан гирсек де, «буссагьат» деп бары затны къоюп, сени мурадынгны битдирер эди. Мен эсге алмагъа сюеген кёп затлар бар. Биз ону булан кёп ерлеге баргъанбыз, сапаргъа чыкъгъанбыз. Не ерге барса да, ол оьзюн оьтесиз арив тута эди. Ону бек агьамиятлы ва маъналы хасияты бар эди. Бары затны артгъа салмай, тез заманны ичинде этмеге сюе эди. Къайда алгъасайсан дегенде: «Адамлар кёп де яшамай, ойлашгъан ишни вакътисинде этмеге герек», – дей эди.
.
