Алдагъы гюнлерде  Къырымда  Россияны кёп  миллетли халкъларыны инчесаниятыны «Таврида.Арт» деген  фестивалы оьзюню  ишин тамамлагъан. Эсгерилген шо фестивальда дагъыстанлы яш уланлар да,  къызлар да оьзлени ортакъчылыгъын болдургъан.

Ачыкълашдырып айтгъанда, фестивальны барышында дагъыстанлы жагьиллер инчесаниятгъа байлавлу яшавгъа чыгъарылагъан проектлени оьлчевюнде оьтгерилеген  билимлерини сан янын камиллешдиреген гьаракатларда ортакъчылыкъ этген. Шондан къайры да,  йылны боюнда  арасы бирде  бёлюнмейген кюйде иш юрютеген яратывчулукъ сиптелени «Меганом» деген Академиясы оьтгереген  гьаракатлагъа да къуршалгъан.

ДР-ни яшёрюмлерини ишлерине къарайгъан министерлигини жагьиллени республика центрыны ёлбашчысы  Гюлнара Алиеваны сёзлерине гёре, дагъыстанлы жагьиллени фестивальда ортакъчылыкъ этгенлиги бек агьамиятлы агьвалат гьисаплана. Неге тюгюл де, фестивальны барышында  олагъа бизин уьлкени гьар еринден гелгенлер булан сынав алышдырмагъа имканлыкъ берилген. Шо фестивальны  барышында топлагъан билимлери булан пайдаланып, ону ортакъчылары маданиятны оьсдюрювге  болушлукъ этмеге болагъан янгы сиптелени яшавгъа чыгъармагъа  болажакъгъа умут бар.

Шо гьакъда айта туруп, бу йыл фестиваль Россияны миллетлерине, олай да бизин уьлкени регионларында яшайгъан жагьил адамланы инчесаният ва маданият тармакълардагъы чалышывуна багъышланып оьтгерилгенин айрыча эсгермеге тюше.

 

Б. АЙБОЛАТОВ.