Охувчуну тергевюн тартардай язма герекбиз
Ассаламу алейкум, уьюгюзге яхшылыкъ! Газетни охувчуларына оьзюмню таныш этмеге сюемен. Анадаш халкъыбызны «Ёлдаш» деген маълумат къуралын кёп гиччиден таныйман, загьмат ишимни де мунда башладым. Лап студент заманымдан берли къайда ишлежегим белгили эди, яйлыкъ практикамны да «Ёлдашда» оьтгере эдим.
Атамны ёлун узатып, мухбирлик касбуну сайладым, яшлайын редакциягъа геле туруп, онда ишлейген агъайланы, баживлени таныйгъан болдум. Гьатта редакцияны кагъыз ва бояв булангъы айрыча тамаша ийисин сезе туруп, шогъар уьйренип къалдым. Ишлеме тюшгенде биринчи муаллимим – атам Абдулгьамит Мичигишев, сонг Агьмат Жачаев, Далгьат Алкълычев, Яраш Бийдуллаев касбума тюшюнмеге кёмек этди, кёп затгъа уьйретди. Аллагь рази болсун олагъа, савлукъ ва узакъ оьмюр берсин. Сонг 30 йылны узагъында языв-бузув булан доланып, бир гетип, муна 15 йылдан сонг «Ёлдашгъа» къайтып гелдим, узакъ сапарым битип, ата юртума къайтгъандай болдум.
Анадаш редакцияда мени алдан берли таныйгъанлар да бар, артда къошулгъанлар да языв ишин юрюте. Барысы да касбусун оьр даражада билеген, пагьмулу мухбирлер. Халкъны болгъур адамлары. Бир ёлда экенибизге инанаман. Аслу мурадыбыз – «Ёлдашны» бетлеринде элибизде, дюньяда болуп турагъан агьвалатланы суратламакъ булан бирче, ана тилибизни сакъламакъны, тарихибизни ахтармакъны, адатларыбызны унутмай юрютмекни гьайын этмек. Шону учун имканлыкълар кёп бар, гьар гюн янгы-янгы кёмекчи алатлар да яшавгъа къошула.
100 йылдан артыкъ тарихи булангъы «Ёлдаш» газетибиз халкъны уллусу, тамазасы болуп битген, миллетни сырдашы да дюр. Газетни гьалиги къуллукъчулары оьтген девюрде топлангъан бай сынавну сакълама тарыкъ. Шо сынав маданият, инчесаният, адабият, жамият яшав ва оьзге хыйлы янлар булан байлавлу. Биз буса, оьсюп гелеген наслугъа шону эсен-аман етишдирмеге борчлубуз. Ондан къайры, дюньяны ер-ерине яйылгъан къумукъ халкъны вакиллери газетге ювукъ болса, охуса, ойларын етишдирсе, «Ёлдаш» миллетибизни маданият атавудай болар.
Газет охулмай деп бир-бирде кант эшитиле. Шону себеби – бир яндан ана тилинде сёйлеп, язып болагъанлар аздыр. Амма къужурлу маълумат болса, охувчуну тергевюн тартагъан агьамиятлы макъала язылса – шо заманда да охулмасмы экен? Къумукъ тилде олай оьр даражада язылгъан асарлар ёкъ дейгеним тюгюл, озокъда, бар. Инсан иштагьланып охусун учун, редакцияны къуллукъчулары да, бизге тышдан язагъанлар да пагьмусун бар чакъы къолламаса, гьар язгъаны конкурсгъа йиберилегендей болмаса, шо заман, гертиден де, охувчуну гёнгюн алма къыйындыр.
Не ишни де сан яны оьр даражада болмаса, алывчу (яда охувчу) шону къабул этмес, арив башгъасын сайлар. Шо саялы пагьмубузну къоллап, янгы къайдалагъа уьйренип, охувчуну юрегине, оюна гьар жума дегенлей ёл тапма герекбиз.
Охувчулар булан байлавлукъ тутмакъны яныбыз, номерлерибиз берилген, электронный почтабыз да шу: eldash1917@mail.ru
Азиз МИЧИГИШЕВ.
