Илмутдин Аскеров – Буйнакск районну Янгы Къумукъ юртундан. Ол юртдагъы совхозну савун-тувар фермасында гьар тюрлю жаваплы къуллукъланы юрютюп тургъан Шарабутдинни ва сурсат тюкенни заведующийи болуп ишлейген Кабиратны агьлюсюнде 1984-нчю йылны 1-нчи апрелинде тувгъан.

Янгы Къумукъдагъы школаны яхшы къыйматлар булан тамамла­гъан сонг ол Дагъыстан пачалыкъ педагогика институтну тарих ва ихтиярланы уьйретеген факультетинде охуй. 2006-нчы йылда ол асгерде къуллукъ этме чакъырыла.

Уллу Ватан давну ортакъчысы, уллатасы Жамавну асгер опуракъ гийип­ чыкъгъан суратларына къарап, таза дегинче сукъланып торайгъан Илмутдин Ленинград областны Выборг районуну Каменка юртунда ерлешген 138-нчи мотострелковый бригадасында асгер борчун кютме гирише. Аслу болжалы битгенде дагъы да эки йылгъа дыгъар байлап къуллукъ этивюн узата.

2011-нчи йыл Илмутдин Аскеров старший сержантны чининде Буйнакскиде ерлешген мотострелокланы 136-нчы бригадасына взводну командирини кёмекчиси гьисапда чыгъарыла ва къуллукъ этип турагъан заманыны ичинде борчларына оьр жаваплыкъ булан янаша.
– 2022-нчи йыл февральны башында бизин асгер бёлюкню уьйренивлер оьтгермек учун Украина булангъы дазу бойгъа чыгъардылар. Арадан кёп заман гетмей, бизге хас асгер гьаракатда ортакъчылыкъ этме тюшдю, – деп хабарлай Илмутдин. – Запорожск областны Любимовка посёлогуну янында бизин асгерлер алгъа гьужум этивюн токътатмай узатып тербей. Артиллерия гаубицаланы бошавсуз топ-гюлле явдура­гъаны гьужум этегенлени ругьуна гюч къоша. Март айны 6-сына таба эки де якъдан авур топлар булан атышыв гючленип гетди. Бизин позицияны ювугъуна тюшюп атылгъан топ-гюллени яркъычы, ер бавурлап ятсам да, бетимни онг ягъына тийип, къангъа юздюрдю. Гьазиринде асгер ёлдашларым гелип, яралангъан бирдагъы ёлдашымны ва мени бирге гётерип алып ювукъдагъы школаны подвалына элтгенлер. Позицияны аманлыгъын сакълай­гъан БМП-ни гьайдавчусу, юртлум Камал Зайниев тезликде санчастдан медик, ст.лейтенант А.Шевченкону чакъырып укол этдиргенлер.

Бетиме тийген яркъычны тайдырып сав болмакъ учун Мелитопольну, Севас­топольну, Владикавказны госпиталларында ятма тюшдю. Яркъычны таъсиринден гёрмейген болгъан онг гёзюм гьали де ерине гелип битмеген. Бирдагъы операция этилсе, сав болма умут бар.
Россия Федерацияны Президенти В.В.Путинни 2022-нчи йыл 21-нчи мартдагъы Указы булан Илмутдин Аскеров «Къоччакълыгъы учун» деген медаль булан савгъатлангъан.

Ярасы сав болуп битмегенине де къарамайлы, Илмутдин Аскеров бугюнлерде де асгерлик борчларын кютювню уллу намус билип узата.

–Тийишли болса, Ватанны аманлыгъын къорумакъ учунгъу гьаракатгъа къуршалып чалышма гьар заманда да гьазирмен, – деп жаваплана ол саламатлыгъын сакълагъан гьалда.

Дагъыстан Респуб­ликаны Башчысы С.А. Меликовну 2022-нчи йыл декабрни 28-нде чыкъгъан къарары булан «Яшёрюмлени патриот ругьда тарбиялав ишге этеген къошуму учун» Илмутдин Шарабутдинович Аскеровгъа Амет-Хан Солтанны атындагъы медаль тапшурулгъан.