Алда полицияда къуллукъ этген Салигь Алиевге къаршы ачылгъан уголовный ишге байлавлу тергевлер тамамлангъан ва судгъа бакъдырылгъан.

Ахтарывчулар токъташдырагъан кюйде, С.Алиев иш ёлдашлары Ильяс Магьамматов, Гьюсенгьажи Гьюсенгьажиев ва Мурат Буттаев булан   Магьачкъалада эр-къатынны токътатып,  къолларына гючден наркотик­лени тутдургъан болгъан. Сонг полиция бёлюкге алып баргъан, оьз­леге протоколлар язылып уголовный иш ачылгъанны сюймей буса, олардан 500 минг манатны талап этген.

Гечге таба полицейскийлени законсуз ишлери ачыкъ этилинген. Ахтарывчулар С.Алиевни кабинетинде наркотиклени тапгъан. Суд Гь.Гьюсенгьажиевни, И.Ма­гьам­матовну ва М.Буттаевни шарт булан 2 йылгъа эркинликден магьрюм этмек деп къарар чыгъаргъан.

С.Алиевни ишине август айны 23-нде Магьачкъаладагъы Ленин район судунда къаралажакъ.

Алав АЛИЕВ.