Ёллар гьар гюн хыйлы агьлюлени къайгъы-дертге дёндюрюп, гиччи-уллу деп къарамай, оьзюню къурбанларын алып гете. Бу гьалиги гьаллагъа къарагъанда, шо къайгъылы сиягьны толумлашдырагъанланы санаву къачан буса да аз болар дегенге де умут аз.
Дагъыстанлы машин гьайдавчуланы низамсызлыгъы гьакъында савлай Россияда хабар юрюле. Тек тамаша, олар тавлар элинден ариге чыкъгъанда, ёл юрюшню бары да къайдаларын шоссагьат эсине алалар.
Магъа оьзюме де кёп керенлер ёл хатабалагьланы шагьаты болмагъа тюшген. Шолар бириси де сонг унутулмай даимге эсингде къала, айрокъда хатабалагьда яшлар зараллана буса. Бизин пачалыкъны законлары оьзюне машин гьайдама имканлыкъ тюшген бир-бир эдепсиз абдаллагъа гьатдан озуп йымышакъ янашамы экен деп ойлашаман. Мисал учун, машин гьайдавчуну айыбындан хатабалагьда адам оьлген буса, ол Россияны Уголовный кодексине гёре нечик такъсырлана деп эсигизге геле.? Аслу гьалда судлар шолай адамны 5 йылгъа эркинликден магьрюм эте. Хоншубуздагъы Китайда оьлюм суд геселер. Сауд-Арабыстанда 300 керен таякъ булан уралар. Шону да оьлюм тёреге гьисаплама ярай. Оьзге пачалыкълардагъы мисалланы да гелтирме ярай. Айтагъаным, ёл жинаятчылагъа бизде йимик йымышакъ, «рагьмулу» янашыв дагъы бир ерде де ёкъ.
Сёз ёругъунда, яй айларда оьзюм турагъан орамда мени гёз алдымда болгъан агьвалатны гьакъында айтмагъа сюемен. Мирзабековну атындагъы гезев бавдан чыгъып гелеген ерде, анасы гиччи къызы булан светофорну яшыл янгъан ярыгъына инанып ёлдан чыкъма къарагъанда, бек чалт гелеген «Жигули» токътамай, экисин де уруп йыкъды. Гьайдавчу, шогъар шагьат болгъанлар буссагьат оьз тёресин гесер, токъалар дегенден къоркъуп, шоссагьат машинин де ташлап къачып абзарланы ичинде яшынды. Негьакъ яшынмагъан эди, неге тюгюл мен оьзюм де, оьзгелер къошулмагъан буса, ёл ягъадагъы уллу ташны алып башына уражакъ эдим.
Артындагъы гюн Ич ишлер министерликни янындан билдиривню къаравуллайман. Тек хабары чыкъмады. Маълумат бёлюгюне зенг этгенде де нени гьакъында лакъыр юрюлегенни англамайгъан йимик сесленди. Ана-баланы къысматы сонг не болгъанны, шо гьайдавчу-къурумсакъ тутулгъанмы – билме бажарылмады.
Гьали прокуратураны сайтында ерлешдирилген билдиривге къарайман. Олар билим берив министерлик булан республиканы Башчысыны тапшурувуна гёре, Дагъыстандагъы автошколаланы тергеп чыгъажакъ (гьалиге ерли чоласы болмагъандыр). Неге тюгюл, Ич ишлер министерликни ёллардагъы аманлыкъны болдурагъан къуллугъуну начальниги А. Шалагин билдиреген кюйде, хатабалагьланы кёбюсюне сынаву ва англаву ёкъ гьайдавчуну шагьатнамаларын янгы алгъанлар себеп болуп токътай . Ол гелтирген маълуматлагъа гёре, Дагъыстанда 43 автошкола бар. Олар янгыз гетген йыл 22 минг адамгъа гьайдавчуну шагьатнамасын алмагъа ихтияр берген. Тек ёлдаш Шалагин олар барысы да ахырынчы экзаменин оьзю башчылыкъ этеген къурумда берегенин эсгермеген.
Озокъда, «Жамият ва низамны» узата туруп, нечакъы сюймесем де, ёллардагъы къайгъылы агьвалатланы гьакъындагъы хабарымны узатмасам, амалым ёкъ. Бир-бир машинлени арт терезелерине: «Сени уьйде къаравуллай!» деп язылып бола. «Эсен-аман» деп де къошар эдим.
