Магьачкъаладагъы Ленин район судда ерли адамны уголовный ишине къаралгъан.

Судгъа бакъдырылгъан материаллагъа гёре, ол гетген йылны июль айыны 31-нде къатыны булан къардашларында къонакълыкъда болгъан. Саламлашып-сорашып битгенде, стол да къуруп, гьаракъы ичме башлагъанлар, шайлы кепленгенлер. Бир вакъти къонакъ сигарет аламан деп тюкенге гетген. Шо мюгьлетде уьйге хоншуда турагъан адам гирип гелген ва къатынгишиге къарышма, илинме урунгъан. Къонакъ къайтып гелгенде болгъан ишни гьакъында къатынындан билип, хоншуну токъалагъан, ахырда бувуп оьлтюрген.

Суд ол алда да туснакъларда туруп чыкъгъанын гьисапгъа алып, жинаятчыны 8 йылгъа эркинликден магьрюм этмек деп тёре гесген. Туснакъ болжалын ол къатты низамы булангъы колонияда оьтгережек. Оьр суд район судну къарарын гючде къойгъан.

Алав Алиев.