Муаллимлик адамгъа тувмадан гелеген касбудур. Муаллим болмакъ яшланы сююп билмек булан байлавлу. Мен бугюн сизге шолай яшланы сююп де ва аяп да билеген бир сынавлу муаллимни, оьзюмню иш ёлдашымны гьакъында язмагъа сюемен.

Найида Сайпуллаевна Алиева Буйнакск шагьарда 1976-нчы йылда тувгъан. 1993-нчю йылда Буйнакск шагьардагъы 4-нчю мактапны тамамлагъан сонг, Расул Гьамзатовну атындагъы педколлежде охувун узатгъан. Педколлежни 1996-нчы йылда тамамлап, Найида Сайпуллаевна Буйнакск шагьардагъы 10 номерли мактапда ишлемеге башлай. Ишин узата туруп, Найида Сайпуллаевна Санкт-Петербург шагьарда А. Герценни атындагъы педагогика университетни 2005-нчи йылда заочно тамамлай.

Шо йылдан бугюнлеге етишгенче ол оьзюню муаллимлик касбусун да юрюте. Демек, 27 йылны узагъын­да ол кёп охувчуланы яхшы ёлгъа салгъан. Олар оьзлени кёп сюеген муаллимине гьакъ юрекден баракалласын билдирелер. Найида Сайпуллаевна – абурлу муаллим. Ата-аналар, коллективи ва охувчулар ону ишине берилгенлиги саялы рази­лигин билдире. Абурлу муаллим кёп керенлер Буйнакск шагьар администра-циясыны, билим берив управлениени янындан грамоталар булан савгъатлангъан. Найида Сайпуллаевна – охувчуланы дарсгъа иштагьын гелтирме болагъан муаллим, яшлар ону гьар гюн кёп сююп къаравуллай.
 Оьзю де – уьч авлетни насипли анасы.

– Сиз муаллимлик касбуну не себепден тангладыгъыз? – деймен огъар.
– Мен оьзюм гиччиден берли муаллимлик касбугъа бек гьасирет эдим. Мени атам да – кёп йылланы узагъында шо касбуну уьстюнде чалышгъан адам.

– Сиз нечик ойлашасыз, муаллим болмакъ учун адамны не йимик къылыкъ-хасиятлары болмагъа герек?

– Муаллим оьзюню алдында охуйгъан гьар-бир яшны ич дюньясын билмеге герекдир. Яшланы сююп де, англап да билмейгенге муаллим касбусун юрютмеге кёп къыйын деп эсиме геле. Мен яшланы гьакъ юрекден кёп сюемен, тек шо сюювню яшлагъа берип билмеге де борчлу. Яшлар муаллимни оьзлеге бакъгъан сюювюн гьис этмеге герек, шо заман яшлар сени де ва сен яшланы да англайсан.

– Сиз нечик ойлашасыз, яшлар булан ишлемеге башлапгъы класларда четимми яда оьрдеги класларда четимми?

– Муаллим оьзюню ишине сююп янашгъан сонг, бир четимлиги де гёрюнмей деп эсиме геле. Айтагъа­ным, адам оьзю сюеген, оьзю гьакъ юрекден танглагъан касбуда чалыша буса, иш уьстде ёлугъагъан четимликлени де ол енгил кюйде енгмеге бола.

– Гьалиги оьсюп гелеген наслуну тарбиялама бираз къыйын экени белгили, сиз нечик ойлашасыз ва нечик чаралар гёресиз?

– Буссагьатгъы оьсюп гелеген наслугъа телефонланы заралы тие, тек шо заралны алдын алмакъ учун яшлар булан пайдалы темалагъа кёп сёйлемеге герек. Яхшыны да, яманны да англатып, олагъа тюз ёлланы гёрсетмеге тюше. Биз, яшав гёрген уллулар, эгер де яшланы тюзевлю тарбияламасакъ, олагъа тюз ёлну ким гёрсетежек? Шо гьакъда яшлар булан кёп лакъырлашывлар юрютемен. Тарбиялав дарсланы уьс­тюнде ишлеймен. Мени охувчуларымны арасында бир де тарбиясыз, эрши ишлени юрютгенлери гьалиге болмагъан.

– Найида Сай­пуллаевна, сизин охувчуларыгъызгъа, иш ёлдашларыгъызгъа не йимик ёравларыгъыз бар?
– Башлап, яхшы савлукъ ёрамагъа сюемен, гьар-бир муратларына Аллагь етишдирсин!