Яшав даражасы осалланы талапларын гьисапгъа алып, арт вакътилерде РФ-ни Гьукуматы уьлкебизни башчысы Владимир Путинни таклифине гёре харж булан кёмеклешив бар экенин эсгермей болмайбыз. Аз болсун, кёп болсун деген кюйде, бар имканлыкълагъа гёре айлана якъда тувулунгъан къыйынлы гьалланы шартларында далапчы тайпаланы янындан чарасызланы гьайы этилинегени гележек учун инамлыкъны тувдура.
Бу йыл сентябр айны 10-нчу гюнюнде ДР-ни далапчылыкъ булан машгъул болма муштарлыланы якълайгъан центрында юрюлген генгеш де шолай агьамиятлы масъалагъа багъышлангъан эди. «Оьз бизнесин ачма муштарлылар учун яшавлукъ дыгъар-контракт» деген темагъа багъышлангъан генгешде ортакъчылыкъ этген ДР-ни загьмат министерлигини ва Магьачкъала шагьарны администрациясыны вакиллери залдагъыланы кёп къадардагъы соравлагъа да жаваплар къайтардылар.
Белгили болгъан кюйде, яшав гьалы къыйын тайпалагъа оьз ишин онгача далапчы гьисапда ачма хыялы барлагъа къурулгъан бизнес-проектине гёре 250 минг манат ва онгача абзар хозяйстволаны юрютегенлеге пачалыкъны янындан 100 минг манат харж булан кёмек этилинежек.
Шону учун бу йылгъа 800 миллион манат бюджет харжлар айырылгъан. Аянлашдырылгъан кюйде, ломай оьлчевлерде харж булан кёмеклешив яшав даражасы осал тайпалагъа оьз ишин къуруп юрютмек учун сонггъу йылларда да гёрсетилинежек деп умут этилине.
Яшав даражасы осалланы арасындан шолай кёмекден агьлюде оьзюне 23 йыл битген адам пайдаланмагъа бола. Агьлюсю ёкълагъа харж кёмек 18 йыллыгъындан тутуп этилежек.
Гьалиге ерли шону учун республикабызны муниципал къурулувларындагъы яшавлукъ къуллукъланы кютеген центрлагъа 500-ге ювукъ арза берилгени гьакъда да айрыча эсгерме тюше. Шолай харж кёмекден пайдаланма муштарлылар эсгерилген къуллукъну ерлердеги центрларындан таба генг кюйде англатыв алмагъа болажакълар.