Студентлер учун - касбу сынавлар

Студентлер учун - касбу сынавлар


Талатгюн, сентябр айны 21-нде, сакъатланы арасында касбу бажарывлугъуна байлавлу гезикли чемпионатыны республика тирети оьзю­ню ишин башлагъан. Бу йыл шо чемпионат бешинчи керен оьтгериле. Эсгерилген чемпионатны барышында шонда ортакъчылыкъ этеген оьр ва орта хас билим береген охув ожакъларыны 100-ден артыкъ студентине гьар тюрлю 18 касбуда оьзлени сынамагъа имканлыкъ берилген. Чемпионатны ортакъчыларыны бажарывлугъуна 150-ден де артыкъ сынавлу касбучу къыймат бере.

Оьтгерилеген шо чемпионатны оьлчевюндеги аслу гьаракатлар Дагъыстан пачалыкъ педагогика университетини спорт къаласында юрюле. Шатлыкъны шартларында оьтгерилген чемпионатны ачылывуна багъышлангъан гьаракатларда ДР-ни загьматны ва яшавлукъ оьсю­вюню министри Изумруд Мугьутдинова ортакъчылыкъ этди. Ол Дагъыстанны Баш­чысыны борчларын заманлыкъгъа кютеген Сергей Ме­ликовну ва бизин респуб­ликаны Гьукуматыны атындан жыйылгъанланы къутлап сёйледи.

– Бираз алда чемпионат бир нече касбуланы есилерин тюгюл къуршамай эди. Бугюнлерде буса гьар тюрлю касбуланы есилерине оьзлени бажарывлугъун гёрсетме, оьсювюн болдурмагъа имканлыкълар берилген. Шо чара да «Бир-биревге ошамасакъ да, биз тенг ихтиярлыбыз!» – деген чакъырывну тюбюнде оьтгериле. Чемпионат гене де лап да пагьмулу, къыйынлыкъланы алдында къайпанмайгъан, оьзлер юрютеген ишин гьакъ юрекден, къарны-гёнгю булан кютеген, янгыз оьзлени касбусунда тюгюл, билим алывда да, яратывчулукъ гьаракатда гёрсетмеге болгъан адамланы къуршагъан,– дей туруп, министр чемпионатны ортакъчыларына уьстюнлюклер булан бирге ругьдан тюшмей турмакъны да ёрады.

Эсгерилген чемпионатны экинчи гюнюнде, демек, сентябр айны 22-синде, ДР-ни Гьукуматыны Председателини заместители Мурат Къазиев, загьматны ва яшавлукъ оьсювюню министри Изумруд Мугьутдинова, яшёрюмлени ишлерини министри Камил Сайитов студентлени арасында юрюлеген касбу сынавланы барышы булан ювукъдан таныш болду. Мурат Къазиев билдиргени йимик, чемпионатны ортакъчыларыны са­наву йылдан-йылгъа арта. Чемпионатны вакътисинде оьтгерилеген сынавлар ону ор­такъчыларына, савлугъу осал, сакъат адамлагъа, гьар тюрлю касбуларда сынав топ­ламагъа, шону булан бирге, оьзюне де, савлай жамиятгъа да касбуда оьрлюклеге ес болгъандан къайры да, яшавда ерин тапмагъа болгъанын гёрсетмеге шартлар ярата.

Чемпионат оьзюню ишин бугюн, сентябр айны 24-нде, тамамлажагъы гьакъда да айтмагъа тюше. Чемпионатны алдынлылары белгиленген сонг, оланы савгъатлавлар да оьтгерилеже