Студентлер савгъатланды

Студентлер савгъатланды


       Арбагюн, февраль айны 26-сында, Дагъыстан пачалыкъ политехника университетде «Успех» деген савгъатны тапшурувгъа байлавлу жыйын оьтгерилди. Йылдан-йылгъа мердешленип гелегени йимик, эсгерилген шо савгъатгъа билим алывда, илмуну ахтарывда, яратывчулукъ гьаракатда, спортну гьар тюрлю жураларында, олай да оьр охув ожакъны жамият ишлеринде жагьчылыкъ гёрсетген студентлер лайыкълы болду.

 

Оьтгерилген шо мажлисде Дагъыстанны билим берив ва илму министрини заместители Альбина Арухова, бизин республиканы политикагъа къарайгъан министрини заместители Мурат Шапиев, спорт клубну къуллукъчусу Арслан Дациев ортакъчылыгъын болдурду. Инг алда, Дагъыстан пачалыкъ техника университетни ректоруну борчларын кютеген Нюрмагьаммат Суракъатов «Успех» деген савгъатны тапшурув артдагъы он йылланы боюнда оьр охув ожакъда оьтгерилеген агьамиятлы гьаракатланы бириси гьисапланагъаны гьакъда айтды. Бизин респуб­ликаны ва уьлкени оьлчевюнде юрюлген гьар тюрлю къаравларда алдынлыкъ алгъан, олай да агьамиятлы проектлени яшавгъа чыгъарывда оьзлени айрыча гёрсетген студентлеге тапшурулагъаны гьакъда да билдирди.


Ону сёзлерине гёре, оьтген йылны гьасиллерине гёре университет бир къадар оьрлюклеге етишген. Ачыкълашдырып айтгъанда, университетде билим алагъанлар Бютюнроссия ва халкъара олимпиадаларда алдынлыкъ алгъан. Шону булан бирге, оьр охув ожакъланы арасында жагьиллер гьазирлеген проектлени яшавгъа чыгъарывда биринчи ерлеге ес болгъан. Россияны Президентини ва Гьукуматыны грантларын алгъанлар да бар.


Оьзюню сёйлевюню ахырында Дагъыстан пачалыкъ техника университетини ректоруну борчларын кютеген Н. Суракъатов студентлени ва аспирантланы етишген уьстюнлюклери булан къутлады.